慳家中坑 - 食篇

跑跑下步落大雨，只好搵個地方避雨，順便打下blog。

中坑好為食，所以係食依方面都花好多錢。我同老婆都好中意食拉面，飲咖啡，食西餐之類，以慰勞自己。

係食依方面既洗費，由開始決心要財務自由都已經作出少少改善，但仍有好多野可以做去慳錢。

已改善：

1. 帶飯盒。其實由踏入社會工作開始都成日帶飯，所以對我黎講都唔會有太大轉變。依家出街食lunch閒閒地都50蚊，一個月都成1000蚊，一年都12000蚊，食水好深。我依家每個月有一半時間都帶飯盒，都慳返唔少。

2. 屋企食早餐。我食早餐一定要配咖啡奶茶，如果唔係果日真係無乜精神，所以之前都成日出茶餐廳食。平時一個沙爹牛肉麵配凍奶茶都要37蚊，就算一個餐蛋治配熱奶茶都24蚊，一個月又係1000蚊既開支。但自從同事介紹左一款濾掛咖啡，連平時唔飲齋啡既我都可以接受，自此之後我有時都會係屋企食個穀物早餐，以一餐計，鮮奶4蚊，穀物5蚊，齋啡5蚊，共14蚊，又慳唔少，最辛苦既係要早多15分鐘起身。（其實食面包仲平，不過唔健康）

3. 帶水。以前出街同做運動後都會買野飲，一支飲品都起碼要10蚊。帶水唔洗錢之餘又健康，依樣改變都好易克服到。（平時放工前都會斟蒸餾水攞返屋企，第二日早上攞黎飲同沖咖啡。）

有待改善：

1. 成日出去食飯。其實可以係屋企煮飯或者返娘家食飯，但有時想出去relax，又唔想老婆成日煮飯咁辛苦，就想出去吃飯。暫時既方案係如果出街食就食早餐或下午茶，會平過食午飯同晚飯。再改善既話就幫襯d有網上優惠既餐廳，不過最好當然係煮飯啦。

2. 口痕買野食。真係唔知點改善，依家最多都係去超級市場代替便利店。😭

慳家中坑 - 衣篇

之前都講到，中坑為左財務自由，會係生活中作出唔同改變。

除左開源之外，仲會節流。

慳家既話，都從衣，食，住，行講起。

上網睇外國d人點慳錢，感覺同香港文化好唔同：同一班鄰居夾錢交換資源，踩單車返工，種菜，合租屋什至租上租。好多都係香港做唔到，所以我就分享一下自己係香港，點用自己既方式慳錢，同時希望大家留言分享下仲有咩方法可以慳錢。

香港黎講，衣著係最易慳，亦都可以洗最少錢。

我對衣著非常隨便又求其，衣櫃入面有幾件衫著超過10年以上。（其中一件係同以前女朋友—-即係依家老婆表白時著的，都有15年歷史🤣）

但人靠衣裝，佛靠金裝，出街見人時都要著返d新淨衫。我又唔太中意淘寶買衫，無得試，所以我都會係差唔多換季果陣先買衫。之前uniquo大減價，每件30幾蚊，我都買左4件，足夠一個夏天替換。

但我有一個（不良）嗜好，就係買波鞋。一年都會洗幾千蚊去買。依樣真係要改一下，成日比老婆捉依樣野去串。

未摵甩依個嗜好前，我會做兩件事去減輕支出：

1. 賣二手波鞋。通常有d學生負擔唔起正價波鞋而去買二手鞋，而我又會好好保養d鞋，例如有d籃球鞋只會係室內場打。

2. 自己改鞋。有d限量版波鞋太貴，就會自己買特製顏料去改，滿足一下自己既虛榮心之餘亦可以培養下興趣。

得閒就講埋食，住，行依3方面。

後記：

以前有得賣二手衫，以磅數計數。以前著到殘果d就攞去賣，不過依家都搵唔到了。