2023回顧及展望

 可以先睇下中坑歷年回顧，睇下我依幾年有無咩進步

2022回顧及展望

2021回顧及展望

2020回顧及展望

港股

中坑港股持倉

港股overall growth -10.09%，上年係-6.45%，即係話今年跌左3.64%

而恆指今年跌16.7%，已經連續跌4年，雖然贏左恆指，但唔見得光彩...

今年開始用收到既股息買入香港電訊(6823)，應該比到我更穩定既現金流。

放左一部分冠君(2778)去幫領展(0823)供股，冠君(2778)真係好廢，以前貪佢有成個朗豪坊同花園街3號，疫情完左業績都無乜改善。從錯誤學習啦，買要買多資產既REITS，要搵機會放走佢。

如無意外港股每年比到我3萬蚊現金流，同上年一樣，唔會再注入新資金入港股，只用現存既倉位同股息買入收息股，選股條件係長期穩定派息同派息長期會有增長。

港股真係無咩好講...年年都咁跌，今次真係...

港股今年組合增長：-3.64% 

港股每年期望增長：5-10% (又又又不達標)

美股

美股組合

直債/ETD組合

話就話S&P500同NASDAQ今年都升左好多，但其實上年跌得甘既關係，其實兩個指數都只係接近歷史高位，所以我9估今年仲有機會升多浸。

今年美股做左D新既嘗試，睇落都唔錯：

1. 大量買入TQQQ同SPXL。7月開始無再買入VOO同QQQ，只買TQQQ同SPXL，目標係直到balance到個槓桿比率為2倍內。因為睇個好多數據都係話最好既槓桿比率為2倍，咁樣買雖然都幾大波動，可能股市太抗奮果陣會減低個比率。

2. 開始的起心肝喺IB開戶，然後買直債。Sofar依家都係買長期國債同短期公司債，用長期國債做一個好安全既現金流(國債5%呀大佬)，買定短期公司債可以收下息之餘，如果股市有咩波動都可以調返D資金去股票度。

因為依家我個組合含有槓桿ETF，所以我股債比會調整至6:4，以降低返波動同風險。

希望個資產配置大約係：

VOO 10-15%

QQQ 10-15%

BRK.B 0-10%

SPXL 15%

TQQQ 15%

債CEF (PTY+PFL+NMZ) 20%

直債/ETD 20%

點解想減持BRK.B比例呢?其實始終BRK.B係靠人去投資。巴菲特同芒格可以50年跑嬴大市呀，但50年後呢?擔唔擔保新一代掌舵人可以做到2位老人家咁犀利既成績呢?再者，其實過去15年BRK.B同VOO都係旗鼓相當(445% VS 485%)，所以可能巴郡神話再無過去咁犀利。

去年目標

今年真係一個懶人之年。書又睇少左，人又懶左。基本上上年既目標完成得好少，可惡！

上年目標：

1. Python，起碼學到基本野先 (學左唔夠一半基本野都唔夠)

2. 電子學上既知識，工作上用到，本身都有興趣 (有接觸下Linux，ROS同ESP32，ROS完全搞唔掂，ESP32玩到想整IOT，但工作太忙玩唔到)

3. 木工，之前幫屋企整書枱從而發掘到依個興趣 (幫阿女整完張床就無再掂過)

學習

今年做左一D改善身體既習慣，分別係沖凍水涼，168節食同冥想。懶得打佢地對身體既好處，我直接貼link啦。

沖凍水涼

168節食

冥想

而且今年又投入步兵行列，之前死都唔肯做返，但之後買左滑板車，送貨速度同舒適度其實都高左好多。送快左又賺多左。不過始終唔可以長做，因為用體力賺錢既收入係最低，最容易被取代既收入來源。

來年計劃

小弟真係對電子同編程有興趣，所以今年既目標基本上同上年一樣：

1. Python，上晒成個基礎課程先

2. 電子學上既知識，想玩ESP32，做到一個voice assistant既IOT

3. 想學期權並真係執行，只係做short黎掙現金流

最終目標

每年寫一次去激勵自己。

退休目標年齡：40歲 (仲有3年時間)

退休預計年齡：43歲 (仲有6年時間) (註：用financial freedom calculator計算)

財務自由進度：23.1%(上年16.1%)

5/2022 股票成績

 

港股：

今個月收左冠君(2778)既股息，不過佢亦係最差表現既股票👎

領展都公佈左業績，股息都係有增長，唔錯，遲D都睇返個業績報告。

6月都會有幾間公司派息，yeah~~

美股：

Nasdaq由最高位跌30%，所以我額外買多5股QQQ

BRK.B由最高位跌15%，所以我額外買多4股

已經無多餘現金繼續入股，所以係沽左VCSH買入股票。

同時再沽VCSH去繼續買入ETD。

好似加息放緩左，升返少少，加油。

財務自由進度：1.65M / 10M

3/2022 股票成績

 

港股：

今個月恆指真係來回地獄又折返人間，由月頭直插落18235，到月尾已經唔覺唔覺升返晒，我既港股組合都幾穩定，跌得最勁都好似唔過5%。

入左VTECH(0303)1手，因為依間公司主要做既兒童玩具好出名，負債少，而管理層每年都好慷慨咁100%利率派息，我入果陣大約13%，可以一戰。

不過入得好少，因為只剩餘好少現金，等其他股票派息時再入。但依隻股票唔係一間護城河好深既公司，所以都唔會入得多。

美股：

繼續月供。

今個月逐步將VCIT轉去PFL同PTY依2隻CEF。

兩大ETF (VOO+QQQ)收復返唔少失地，BRK.B又破頂。

2年期同10年期孳息率終於倒掛，資產配置上可能都要執執。

可以要將股債比由80:20轉做60:40。

財務自由進度：1.78M / 10M 

中坑youtube channel

中坑facebook

嘗試從債劵部分改善美股組合

中坑的美股組合裡股債比大約為80:20的策略。

股票的御三家分別係VOO, BRK.B同QQQ，除左需要平衡地區風險外，基本上都唔會有太大改動。

咁剩返20%既債劵可以點搞呢?本來都用緊債劵ETF去做債劵上的配置，但睇完風兄的<<懶系投資法2>>其中一個篇章講到關於債劵ETF之後，決定放棄用債劵ETF。

節錄自<<懶系投資法2>>

咁究竟債劵部分點樣配置先好呢?睇左幾本有提及債券既書本後，得出以下結論：

1. 買直債/ETD，但要夠分散

2. 要槓桿，更加要識去槓桿

最頭痕係第2點，揀邊隻槓?槓幾多?幾時槓?幾時去槓?都令我投晒降。

最後，發現一樣可以解決晒所有問題，仲有可以幫我做埋第1點既工具，就係固定收益既CEF (CLOSED END FUND)啦。

依度就唔解釋咩叫CEF，因為有好多高手解釋得比我更詳盡，詳情可睇下面連結：

市場先生: https://rich01.com/closed-end-funds-vs-open-end-funds/

Just a Cafe: http://www.justacafe.com/2019/01/cef.html

仲有香港代表Kano兄，佢好多post都有提及CEF，獲益良多。

總結CEF好處：

1. 一班利害一致既經理人幫你揀債同決定點做槓桿

2. 手續費比OEF透明而且低(當然啦，一定比ETF高)

但始終CEF都係經理人主動式管理，唔同CEF都有唔同既成績，所以揀CEF都要小心，什至要同時間買幾隻 (暫時得一隻心水：PTY)。

而且，CEF唔同直債有到期日，成本價得唔到保障。

咁債劵部分暫時決定咁配置，比數未定：

1. ETD/直債

2. CEFs

隨住年紀越來越大，債券比會慢慢增長，希望依個債劵配置做到大約每年7-8%增長啦。

註：

今個月無每月股票回顧，因為唔知點解google finance死左，睇唔到0823同2778，不過應該成個資產組合都跌得幾甘。 XD

主要做左：

1. 買2手領展@62.45

2. QQQ係高位跌左10%，15%同20%都有入貨，共10股

3. VOO係高位跌左10%有入貨，共3股

中坑youtube channel

中坑facebook

11/2021 股票成績

 

港股：

今個月恆指跌左4.X%，好彩自己個組合無郁過，keep返0% (=.=...)。

之前粵海投資(0270)已經超過組合既25%，所以要減持少少。而建設銀行(0939)又跌落新低，股息率超高，佢既穩定派息同背景令我對佢有信心，所以買入少許，佔成個組合大約2%，再跌可能會再入少少。之前覺得港股既組合太偏向公用股同地產股，希望入下銀行股令依個港股組合更多元化。

而領展今個月都公佈左業績，股息比上年加左10%，買入物流資產同埋再增持海外物業。之前老前輩講過：財務報表之中，很多項目都可以造假或被人為操控（e.g. 資產重估、特殊收益、關連交易等等），唯獨是現金流，尤其是實際派息不可以或很難長期造假。我會寧願相信一間派息穩定而有增長既公司，都唔會相信對將來好有抱負，好有遠景既公司。可能會失去好多機會，但係勝率高好多。依排領展又跌多少少，我會選擇以股代息。

美股：

美股：

今個月S&P500跌左3%，市場就話極度恐慌，笑死中坑😂。大家之前係咪升到麻木晒?

我個組合都跟跌3%，為應付將來美股既調整/熊市，我會採取以下策略：。

1.

如果三大持股 (QQQ/VOO/BRK.B)跌超過10%，就會開始動用手持現金開始買入。

跌到無晒現金就減持債劵去買入股票，正所謂養兵千日用在一時，債劵係美股組合既作用就係為左依個時候用。

2.

下年都會預期加息，我都開始增持VCSH (Vanguard短期公司債券ETF)而減持VCIT，希望令個組合減低加息既風險，同時keep到債劵佔成個美股20%。

3.

如果QQQ由高位跌超過20%，我會考慮開始買入TQQQ。

財務自由進度：1.64M / 10M (本來想今年破1.7M，咁既情況應該難D)

7/2021 股票成績

港股：

真係痴左線，個市可以連續2日跌千幾點，跌左大約4%。好彩我港股都係買收息股，成個星期都係跌左唔夠2%左右。而我今個月係大跌之前入左粵海投資（0270）同冠君（2778），過左個小股災都好彩無跌低過買入價，粵海仲升添！而我都會堅持繼續買收息港股，之前都有講過點解: https://oldmanlearninvest.blogspot.com/2020/12/2020.html

美股：

真係感受到乜野叫悶悶地贏。之前股市就算點調整都好照keep住月供，到依家都不斷創新高。但我都要不斷要remind自己，股市總會有大跌既一日，唔好依家賺得果少少而沾沾自喜，當股市大跌時要大膽d入市（雖然對班股神黎講我只係賺得皮毛）。今個月出bonus，會將9成bonus放入股市，實行time in the market。

財務自由進度：1.44M / 10M

13/7 買入粵海投資(0270) + 冠君(2778)

13/7/2021 買入粵海投資(0270) @10.64 4000股。

原因: 近期跌了接近30%，破3年新低。但佢既護城河一樣無變，有信心增持，依家成為港股組合最重既1隻。

現時有5.5%既股息率，比平時既4%高好多，加上RSI低過30%，所以買入。

買入冠君(2778) @4.42 1000股

原因: 個業績真係唔差，同上年毛利只差3%。但花園道三號同朗豪坊辦公樓空置率都偏高，近87%，相信過左疫情會回返唔少。唔入咁多，先入1000股。

但依家幾乎無晒現金，暫時唔會以股代息，希望盡快收多D股息保持返一定既現金比例。

3/2021 股票成績

 

港股：

依個月恆指跌左2.13%，而我既組合跌左3.3%

主要問題係越秀交通基建(1052)派好低息，股價1日跌左10%，我都因為佢業績差，低派息而清佢倉，只係賺好低既差價。

而粵海投資(0270)公佈業績後，一星期都跌左10%。業績報告話佢盈利跌左10%，主要資本性開支有所提高，但佢總資產提高唔少同佢派息都keep住有增長，我依然先持有，再研究一下會唔會增持啦(應該都唔會住)。

有意再買多一隻股票收息，去填補越秀交通基建(1052)無左的派息。暫時只有置富產業信託(778)納入考慮之選，搵多D時間睇下仲有無其他股吧。

又到港股年結，3年6.45%，每年1.87%增長...真係差...

希望今年港股真係過左熊市好D啦~

美股：

上個月QQQ跌左10%，所以用返之前既策略，跌10%就額外供多D，再跌再加碼。但跌完就升返幾%，唯有再等。

另外，台灣youtuber清流君比較定期定額同一次性投入，結果竟然係一次性投入會比較著數。顛覆左我之前既諗法。可能要對我既月供方法再從長計議。

財務自由進度：1.32M / 10M (今個月唔係太好，只有唔夠1萬既增長😐)

清倉越秀交通基建（1052）

前一日公佈業績，全年純利跌85%，派息7港仙。

報告話因肺炎期間要免費通行，所以跌咁多。但係大佬呀，你淨係得3個月免費，無左1/4啫，點解可以跌左85%呀？

好，我再望下年報，睇到物業公允值都係跌少少啫，都唔會咁差呀？

再望下年報，上年年尾又話買左個公路，我當你用左d錢買資產作增值，但係咁樣而犧牲左股東既股息（比上年比較少左66%股息），sorry中坑都係接受唔到。🖕🏻

所以今日清晒所有越秀交通基建，淨係計股價都有賺少少。

算啦，揸返少少現金，等跌再買其他股。

唉，揀公路股上有陰影🥲

2/2021 股票成績

 

港股：

中坑成堆舊經濟股發威，成個組合一個月內升左7%。雖然不及增長股升勢咁勁，但以收息股黎講，依個升幅絕對接受。

新地(0016)升得好勁，但都未去到唔合理水平，可能再渣多陣。

我覺得冠君(2778)，長建(1038)同中電(0002)都未去到合理水平，再等等。

中電(0002)，新地(0016)，冠君(2778)出左業績但未有時間睇，希望抽到時間睇下。

美股：

岩岩又係年結：每年7.92%增長

雖然上年美股大升，因為係第1年玩美股，所以基本上都係月供股票同埋買左唔少債，所以分薄左唔少增長。但為左平衡風險，都要照做。

今個月美股急跌，趁機再買兩隻ETD: WRB.PR.G同SOJE收下息。

財務自由進度：1.31M / 10M

8/2/2021 首次"真正"買入ETD - BSA

以USD25買入13股 BSA (BrightSphere Investment Group Inc, 5.125% Notes due 8/1/2031)

參考網址: 

https://innovativeincomeinvestor.com/security/om-asset-management-plc-5-125-notes-due-2031/

BSA為中坑第1次"真正"買入ETD。(之前買左1股TBB黎試一下個感覺)

S&P Rating: BBB- (10年入面只有2.X%會倒閉，應該安全既)

Coupon Rate:5.125%

1st Call Date: 08/01/2019 (已經過左期，所以堅持25蚊內買入)

原公司負債唔高，股價都算正常，就試下去馬！！

拜拜啦盈富

今日 (18/12/2020) 終於出手以26.46沽走晒盈富，計埋息既話都賺少少皮毛。係之前果篇都講過，盈富升值又無美股咁勁，收息率又無其他收息股咁高，不倫不類咁。見依家PE都有13倍，都算合理，不如同佢講拜拜。

沽埋港交所D碎股，依家有34%現金可用。想增持現有既股票收息，例如依排跌得好勁既中電，領展，冠君，粵海。

後記：粵海傾得掂未來收費後，一日都差唔多升10%...

2020回顧及展望

港股

依一年對香港前景感到好迷惘，唔會覺得港股以後有太大增長，所以唔會再將額外資金擺入去，任由之前已經擺入港股既資金滾存。而且會逐步將資金移向收息股，令港股變成一個收息組合，因為香港唔收股息稅，比起美股要收30%股息稅黎講，現金流會高好多。希望依個決定可以為將來提供一個好穩定的現金流。

現時組合太偏向地產股及公用股，風險較大，所以想將一部分資金移向其他行業。今年年尾考慮左好多唔同行業，有電訊，公路，物流等，最後都係揀左公路股，因為公路股係結構性壟斷既行業 (個人唔中意品牌壟斷既行業，就算依家做得幾壟斷都好，終有一日如果服務做得唔好，或者有新技術代替既話，護城河好易就被摧毀)，希望可以揀多一兩個行業去投資。

公路股上我會先揀越秀交通基建 (1052)，第一佢分佈比較分散，第二佢往年有穩定股息增長。但佢今年中期唔派息，有D卻步，所以唔會入得太多住，等佢全年業績恢復派息會再入返多D。

仲有中坑想慢慢將盈富所佔組合減至10%，什至更低。因為股息率比起收息股實在太低 (最多~3.5%)，我又唔覺得會有高增長，所以會揀個時間減持。

港股今年組合增長：0% (唉...)

港股每年期望增長：5-10% (主要係股息)

美股

上年研究左好耐，今年先第一次玩美股。

基於我既英文真係好屎，而且對美國唔熟悉 (連美國都無去過)，所以暫時只會入ETF。而且我會參考Benjamin Graham既建議，會以市場既平貴程度進行資產配置：

市場亢奮 - 股票25%，債劵75%

市場合理 - 股票50%，債劵50%

市場悲觀 - 股票75%，債劵25%

ETF方面，我揀左QQQ (科技增長)，VOO (整個美國市場)，BRK.B (其實佢唔係ETF，但係佢包含全球優質股票，所以我揀左佢)作股票組合，比例為1:1:1。而債劵ETF本身我係揀BND(國債+企業債)，後來我揀左VCIT(中期企業債)，因為佢入面最低評級既債券都係BAA (已經好高)，而且中期債劵對利率不太敏感，帶來穩定增長之餘又可以避險。

我認為現時市場太過亢奮，我會先逐步將VCIT佔比加大至50%，同時保留一定現金，如果市場大跌會進一步投入股市。

如果有一D額外收入 (例如雙糧，bonus)，同老婆商量後，會入返D收息股，暫時我會揀VYM，VYMI，VNQ (本身想揀埋VNQI，但今年唔知點解無派息)

暫時依個策略好適合我，依個組合唔需要我太多時間去睇年報同分析個股，比我多D時間去湊小朋友同有空間去搵機會增加額外收入 (小生意，買baby bond等，一陣再講)。

美股今年組合增長：18% (主要因為3月大跌果時入左唔少)

美股每年期望增長：10-15% 

學習

今年睇左幾本書，最深刻都係下面依幾本書 (依度唔寫書評啦，之前寫過)。

漫步華爾街 (ETF神書)

富爸爸投資指南（上，下）(教我對資產既定義同推使我做一下小生意)

FIRE 財務自由 (推使我做小生意，做副職同如何省錢)

現金流為王1, 2 / 懶系投資法 (教我如何買債券同槓桿)

來年計劃

1. 學習如何買債劵。先學習買ETD開始。

2. 做下小生意 。主要係做賣野，希望做到另一種被動收入來源。

    A. 我有少少3D打印技術既知識，所以想賣用3D打印做既精品，有興趣可以睇下以下連結：

          https://www.instagram.com/fayshomeware/

    B. 我都好中意唔同NBA球星，所以都賣下掛畫

最終目標

每年寫一次去激勵自己。

退休目標年齡：40歲 (仲有6年時間)

退休預計年齡：43歲 (仲有9年時間) (註：用financial freedom calculator計算)

退休儲蓄目標：12% (漫漫長路...)

        

(22/10/2020) 買入粵海投資

今日買入一手(2000股)粵海投資（0270）@11.9

共需$23800

之前13蚊買入，大約有4.5%股息，依家股價再跌10%，大約有4.8%股息。有d衝動買入，本來想等到有5%股息先入，不過都ok啦，我好相信佢盈利唔會變得太差，始終政府力撐市民飲東江水(-_-...)。

今日咁岩又到月供時間，入左217股越秀交通（1052），大約1000蚊。

28/9/2020 買入1052越秀交通基建

今日以$4.5買入2000股1052越秀交通基建。

港股組合不嬲太寡，唔係地產就係公用股，好耐之前已經想加多一兩個行業分散風險。

最後揀左公路股，依個行業都算係半壟斷。

而一堆公路股入面，中坑揀左越秀交通基建作為我投資依個行業既先鋒。原因有二：

1. 資產分佈比較好，全部都位於中國南部。

2. 派息近5年都只升不跌，而且派息比率都低。

不過，今年疫情關係，可能浮起少少隱憂：

1. 睇過其他大部分公司業績，只有佢既中期業績由盈轉虧

2. 今次中期不派息

可能上年因為買左好多資產，要還得特別多錢。而且上半年有79天因為國家要求所有公路免費通行，導致果段時間差唔多0收入(1052較其他公路股特別，佢真係只有公路既資產)。

好彩，報告中亦有提到國內疫情減退，公路使用量開始回復正常，佢又開始收返公路費，所以應該可以派返末期息。而我睇返每月報告，佢真係一個月比一個月多車。

但我都保守少少，最多入多2000股，直至真係有改善。

今次真係貪佢太高息而已(股息率8.5%，未計唔派中期息)。