慳家中坑 - 食篇

跑跑下步落大雨，只好搵個地方避雨，順便打下blog。

中坑好為食，所以係食依方面都花好多錢。我同老婆都好中意食拉面，飲咖啡，食西餐之類，以慰勞自己。

係食依方面既洗費，由開始決心要財務自由都已經作出少少改善，但仍有好多野可以做去慳錢。

已改善：

1. 帶飯盒。其實由踏入社會工作開始都成日帶飯，所以對我黎講都唔會有太大轉變。依家出街食lunch閒閒地都50蚊，一個月都成1000蚊，一年都12000蚊，食水好深。我依家每個月有一半時間都帶飯盒，都慳返唔少。

2. 屋企食早餐。我食早餐一定要配咖啡奶茶，如果唔係果日真係無乜精神，所以之前都成日出茶餐廳食。平時一個沙爹牛肉麵配凍奶茶都要37蚊，就算一個餐蛋治配熱奶茶都24蚊，一個月又係1000蚊既開支。但自從同事介紹左一款濾掛咖啡，連平時唔飲齋啡既我都可以接受，自此之後我有時都會係屋企食個穀物早餐，以一餐計，鮮奶4蚊，穀物5蚊，齋啡5蚊，共14蚊，又慳唔少，最辛苦既係要早多15分鐘起身。（其實食面包仲平，不過唔健康）

3. 帶水。以前出街同做運動後都會買野飲，一支飲品都起碼要10蚊。帶水唔洗錢之餘又健康，依樣改變都好易克服到。（平時放工前都會斟蒸餾水攞返屋企，第二日早上攞黎飲同沖咖啡。）

有待改善：

1. 成日出去食飯。其實可以係屋企煮飯或者返娘家食飯，但有時想出去relax，又唔想老婆成日煮飯咁辛苦，就想出去吃飯。暫時既方案係如果出街食就食早餐或下午茶，會平過食午飯同晚飯。再改善既話就幫襯d有網上優惠既餐廳，不過最好當然係煮飯啦。

2. 口痕買野食。真係唔知點改善，依家最多都係去超級市場代替便利店。😭