2022回顧及展望

可以先睇下中坑歷年回顧，睇下我依幾年有無咩進步

2021回顧及展望

2020回顧及展望

港股

港股overall growth -6.45%，上年係2%，即係話今年跌左8.45%

比起恆指跌左15%既成績更好，其實組合好多股票都跌得低過恆指，但主要係一隻新鴻基地產(0016)救全家(+13%)同埋組合入面接近5%既股息先至可以頂一頂。

計埋今年，恆指都3年連跌了，最多由高位跌超過50%，究竟恆指幾時先跌完呢?無人知。幸好，我買既港股所有企業都係高現金流既公司股票，而且業務穩定，每年都派到息比我。今年都有兩萬幾股息袋袋平安，而我將今年股息再用黎再投資，得出黎既股息率會比之前更高。

年頭買左VTECH(0303)，但感覺唔係太壟斷，所以好快賣走左。

今年都無再買新股票，因為懶去研究其他行業，其實眼中有心水的，例如江蘇寧滬高速公路(0177)同中移動(0941)，兩個都係護城河深既企業，希望搵到時間研究啦~

同上年一樣，唔會再注入新資金入港股，只用現存既倉位同股息買入收息股，選股條件係長期穩定派息同派息長期會有增長。

港股今年組合增長：-8.45% 

港股每年期望增長：5-10% (不達標)

美股

今年係美股方面做左唔少改動去完善個組合：

1. 由債劵ETF轉左買直債同債劵CEF

睇完風兄的<<懶系投資法2>>對債劵ETF既睇法後，就放棄買入債劵ETF，轉左買直債同債劵CEF。

參考文章：嘗試從債劵部分改善美股組合

但因為唔清楚加息同債市既關係，年初買入唔少ETD(好多ETD都係長債)，而唔去接觸短債，搞到債果方面都幾損手爛腳。不過幸好，我買既所有ETD都係投資評級，理論上只要間公司唔執笠，我都可以唔理佢，一路收息，直到到期日。只係機會成本問題高左D啫，當買個可以彌補既教訓。

CEF就買左PTY同PFL，每個月派息就再投資，由佢自我膨脹，派息增多之餘又可以等減息再升。

2. 買入槓桿ETF

參考文章：無斬倉風險既簡單槓桿方法：買入槓桿ETF (LETF)

要等10年先可以財務自由既時間實在太長，如果可以受少少風險既話，咁就不如「用危險嘅方法玩安全嘅嘢」，即係買入槓桿ETF(LETF)。LETF可以輸到變0，但係無斬倉風險的話，我認為可以配置一部分資金入LETF做槓桿。

現時買入TQQQ同SOXL，暫時各佔組合1.X%左右，視乎情況加倉。

3. 少改動：清倉VNQI

我個倉有少量VNQI，本來打算買黎build up現金流，但依幾年派得又少又唔穩定，所以清倉。

學習

今年工作同湊小朋友方面都好累，都好少去學習一D新既野。尤其youtube，基本上都放棄左，其實有一段片錄左好耐但都係懶得去剪。

年中有研究過乜野係期權現金流，但好似都幾高風險同埋個本要夠大，所以就擱置左。

亦都有睇<<掌握市場周期>>，主要係用加減息同其他人情緒去判斷個市，都仲未掌握得好好。

唯一真係努力研究左出黎並且學以至用既野係CEF同埋LETF，可以投入組合入面。

去年計劃回顧

1. 學習槓桿買債 <<< 用CEF去做另類槓桿
2. 發掘優惠資源 <<< 有去搵下coupon之類，但唔係幾努力去搵。近期搵到由電話月費轉做儲值卡plan，實驗成功後share比大家知。

3. Catch up返拍youtube片 <<< 直接收左皮😓

來年計劃

除左繼續研究投資同額外收入外，想學返D自己有興趣既野多D：

1. Python，起碼學到基本野先

2. 電子學上既知識，工作上用到，本身都有興趣

3. 木工，之前幫屋企整書枱從而發掘到依個興趣

最終目標

每年寫一次去激勵自己。

退休目標年齡：40歲 (仲有4年時間)

退休預計年齡：43歲 (仲有7年時間) (註：用financial freedom calculator計算)

財務自由進度：16.1%(上年17.2%)

無斬倉風險既簡單槓桿方法：買入槓桿ETF (LETF)

平時睇D投資書好多都會提及槓桿，槓桿係一個兩刃劍，可以加倍你既獲利同時可以加倍你既虧損。中坑本身都好怕槓桿依樣野，從小比老豆灌輸唔好借錢，唔好借錢，唔好借錢(重要既野講3次)，成日都好怕輸左要賠錢，而且細個成日睇電視都話炒孖展輸左要跳樓，所以中坑都對槓桿依樣野避之則吉，直到今年先開始敢買債劵CEF，開始試下用比較安全既方法擴大債券方面既回報。

參考文章：嘗試從債劵部分改善美股組合

但除左買債劵CEF之外，仲有咩方法可以無斬倉風險下槓桿我既回報呢?首先我既原則係可以輸晒，但唔可以賠錢，而槓桿ETF (LETF)就係一個好選擇。槓桿ETF係咩就唔多講，最耳熟能詳既一個LETF就係TQQQ，大家有興趣就上網search下有關LETF既資料。

咁我去研究下點樣投資LETF先最適合，研究過程中係連登見到一篇好好既文章：

https://lihkg.com/thread/3232194/page/1 (基於尊重版權，只貼討論區內的內容)

入面我最中意依段：

用現金買指數，屬於「用安全嘅方法玩安全嘅嘢」。
用現金買妖股，屬於「用安全嘅方法玩危險嘅嘢」。

用槓桿買指數，屬於「用危險嘅方法玩安全嘅嘢」。

投資指數比起投資個股絕對係一個比較安全既投資方法。因為指數都會隨住入面每一隻個股既市值而調整比重，分散風險。

(相反，如果想加速回報，就要承擔集中投資既風險)

Source: <我用死薪水讓錢替我賺錢> 讀後感

(我知投資指數唔一定係最安全既方法，恆指就係一個好例子，但買美股既指數都已經算係好安全。如果要再分散風險既話就應該買多幾個國家既指數，什至全球指數。依個方面我都仲思考緊，諗到再講。)

如果投資指數係一個好安全既方法，咁買LETF就係用高風險既方式去買低風險既投資，得出既結果會係咩?

用最受歡迎既QQQ同TQQQ做例子：

根據上圖，最直觀既睇法係長期計既話TQQQ真係可以升到飛天，但係遇到大跌市都可以打回原型。

LETF比起其他槓桿工具既優點：

1. 無斬倉風險 (依個係最吸引中坑既地方)

2. 大部分最多只可以 3X 槓桿

3. 一個最簡單既槓桿方法，複利效應係每日計，所以可以升到好癲

當然LETF都有佢既弱點：

1. 當股市大跌時，LETF會跌得仲甘，股市返家鄉時LETF都未返到家鄉。舉個例子，當年2000年科網股股災大跌再加2008年金融海潚，如果你當時持有TQQQ既話最大就會有99.9%既損失，到依家都遠遠未返到家鄉。

2. 當遇上波動市時，LETF係會慢慢decay下去。

基本上依兩個情況成日發生，尤其遇到第一點真係可以輸清光，所以想用危險嘅方法玩安全嘅嘢就要部分持有LETF同時定期做資產配置。同埋LETF真係波動得好勁，可以一日10幾%上落，要頂得住過山車般既波幅先好持有。

中坑都想加速自己增加資產，所以開始買入TQQQ同SPXL依兩隻流動性較高既LETF，但係未決定好佔成個組合既比重有幾多，決定好再講。

後記：

經清流君youtube既介紹下，我睇左下面依本<<諾貝爾經濟學獎得主的獲利公式>> (其實我覺得英文直譯生命週期投資法好聽D)。

但其實越睇越R頭唔明佢講咩，只係有幾個說法比較深刻：

1. 槓桿投資即係你借未來既錢去提早投資，盡早用複式效應去滾存更多資產，然後退休前慢慢去槓桿。

2. 最多只做兩倍槓桿。

3. 佢唔支持用LETF做槓桿，原因上面講左。

希望第日修為好D再睇多次依本書明佢up乜，或者到時已經財務自由唔洗考慮槓桿(希望啦😂)

二選一：增長VS現金流?

今年美股港股大跌，中坑個總資產都跌唔少。初時我都決定用QQQ，VOO，BRK.B加少量bond去做資產增值，但趁依個機會可以反思返：應唔應該建立一個現金流既資產?

依個topic思考左好耐，我從唔同方面，包括自己身處既主觀因素去一步步思考：

客觀因素

• 以長期黎睇，增長股升得高過收息股；
• 增長股波動高過收息股，而且係熊市時收息股都有一定股息收入；
• 會唔會錯誤長線投資落一個唔得既市場呢? (恆指係一個好例子，幾年前個個都話唔識投資就投資2800，依家賤過地底泥)；
• 雖然睇過好多書話現金流投資成績可以好過投資增長股，但大前題係：1. 識槓桿 2. 識揀股 3. 識睇周期；
• 美股股息要收30%稅

主觀因素

• 我同老婆都有份正職，就算依家其中一個人唔返工都勉強可以支撐成頭家既支出，所以現金流暫時唔會有問題；
• 除左少量債劵同港股高息股外，我已經無任何被動收入 (其實真係應該要建立多幾種被動收入)；
• 我希望10年內退休

從依幾點考慮既話，我暫時都會繼續以指數投資作為我既策略，如果下一次牛市或者退休兩三年前就會開始投放多D現金流資產上。

9/2022 股票成績

今日寫月結果陣都真係有D沉重，因為真係跌得有D離譜。

美股今年由高位開始跌到依家，港股又一路跌到無盡頭咁，足足3年。

但係作為(自稱)長線投資者，唔估市，完全time in the market既時候，咁既大跌市絕對會遇上。

所以依家成日諗，係咪應該因應市場環境去調節自己倉位呢? 現金流VS資產增值? 等我詳細考慮多一陣先。

港股：

好似除左新鴻基(0016)之外，全部破晒3年低。

放左VTECH(0303)，因為覺得其他仲抵。

Starman係本書都講過，如果用股息再投資，假設某隻股票股息一路遞升，什至維持派息，股價跌之後得到既總值竟然高過股價升之後既總值。

除左冠君(2778)之外，其他都可以維持派息，而且領展(0823)，長建(1038)同粵海(0270)什至可以增加派息。

好！繼續捱價...

美股：

S&P500一個月跌8%，我個美股組合都跌到唔少。

依個時候我又開始月供all in股票，唔供債劵。

財務自由進度：1.36M / 10M

8/2022 股票成績

 

港股：

港股都微跌，中坑個港股組合都跌左少少。尤其係粵海投資(0270)，中期業績做得唔差架喎，但一路尋底，唔明點解 XD

依幾個月都收左股息，都買多少少建行(0939)同中電(0002)，尤其建行都8厘息了，對我依個現金流組合有好大作用。

美股：

大升之後又大跌。無乜野，繼續月供，但睇下係all in股票定係買返少少債券。

依段股市大跌，我都思考緊資產增值同現金流問題。

QQQ，VOO同BRK.B都係我用黎做資產增值既部分，但完全無現金流。

依家仲有份工返下，但之後退休，什至有咩意外返唔到工無左收入又可以點搞呢?

所以我都有留意返現金流依個topic。

最基本既收息股呀，BOND呀，REITS呀又點配置呢?

咁岩kano兄又出左依本書，睇左少少，睇落跟現金流為王1，2同懶系投資法差唔多。

先睇下ebook，睇完寫下摘要比自己睇。

財務自由進度：1.54M / 10M

7/2022 股票成績

 

港股：

粵海投資(0270)繼續係咁跌，跌到接近10年低位😅

真係唔明點解可以跌得咁勁，雖然內房股依家做得好差，但佢正職係水務嘛，現金流強勁好多。但我相信佢會升返，再睇下啦，橫掂佢個股息好穩定咁增長。

建行(0939)跌至多年低位，會考慮入貨。

今個月粵海投資(0270)，VTECH(0303)同建行(0939)都派左息，其實依家香港好多公司股息率好高，業務又無乜太大問題既不妨可以用股息再投資。

美股：

今個月終於回歸到正回報。

美股恐懼指數爆晒錶，依幾個月我都無月供過債劵，全部都買晒VOO, QQQ同BRK.B。

隨住市場認為唔會再加息，我堆債劵同股票回返唔少。

但都仲會有隠憂，會否衰退同再加息仲係未知數。

之後我會回復返股債比80:20咁月供。

財務自由進度：1.62M / 10M

如何繼續改善我的投資組合?

我既投資組合好簡單：80%股票 (BRK.B +  QQQ + VOO) + 20%債劵 (CEF + 幾隻ETD)，咁樣既資產配置令我覺得好安心持有。但今年既股市大跌令我思考仲有無得改善依個組合，例如可唔可以避開依個股市大跌?又或者點樣可以額外創造現金流?

經過機緣巧合下，我睇左兩本書：<<期權現金流>>同<<掌握市場周期>>

<<期權現金流>>

期權既意思我唔係度詳細講。以前我聽到期權都覺得一頭無緒，總之覺得係好危險既野。但我見到<<懶系投資法>>作者風兄同我好崇拜既blogger都有玩期權，我就試下接觸依個領域。

以前記得書店有本書叫<<期權現金流>>，就上網搵下。發現公共圖書館有依本既ebook就借黎睇下 (其實圖書館真係好多書，借完睇覺得正既話再買二手書/EBOOK都未遲)。期權想做到安全既現金流就要係有錢同有貨既情況之下做short put同short call，而且只short不put。但應該仲有好多技巧依本書都無乜點講，加上依家一張VOO short都要成100股，都係一路儲股一路慢慢研究下點玩期權，唔知仲有咩書可以睇黎學下呢?

<<掌握市場周期>>

初初學投資時睇依本書都唔知佢up乜，睇到一半就放棄左。到今年真係認真諗下有無得避開依個跌市時就諗返起依本書。依本書都係將巴菲特果句名言 "別人恐懼我貪婪，別人貪婪我恐懼" 好好好詳細咁講一次。講下人地升市時忽視風險呀，跌市時看重風險呀之類。都差唔多睇晒，但都未好清楚點樣掌握市場周期，希望有人推薦下有咩書岩睇。

周期同期權對我黎講係一D好複雜既野，亦都伴隨風險，係一個雙刃劍。希望盡量深入了解並運用。但如果無把握我都係會放棄唔用，情願懶洋洋咁time in the market，晒左D時間學野，但總好過蝕錢吧?

題外話：阿囡現正horrible 3，亦都岩岩重新開學唔習慣而心情好差，搞到我同老婆都好身心俱疲，所以真係無時間同心情去睇書，寫blog同拍youtube😓

11/2021 股票成績

 

港股：

今個月恆指跌左4.X%，好彩自己個組合無郁過，keep返0% (=.=...)。

之前粵海投資(0270)已經超過組合既25%，所以要減持少少。而建設銀行(0939)又跌落新低，股息率超高，佢既穩定派息同背景令我對佢有信心，所以買入少許，佔成個組合大約2%，再跌可能會再入少少。之前覺得港股既組合太偏向公用股同地產股，希望入下銀行股令依個港股組合更多元化。

而領展今個月都公佈左業績，股息比上年加左10%，買入物流資產同埋再增持海外物業。之前老前輩講過：財務報表之中，很多項目都可以造假或被人為操控（e.g. 資產重估、特殊收益、關連交易等等），唯獨是現金流，尤其是實際派息不可以或很難長期造假。我會寧願相信一間派息穩定而有增長既公司，都唔會相信對將來好有抱負，好有遠景既公司。可能會失去好多機會，但係勝率高好多。依排領展又跌多少少，我會選擇以股代息。

美股：

美股：

今個月S&P500跌左3%，市場就話極度恐慌，笑死中坑😂。大家之前係咪升到麻木晒?

我個組合都跟跌3%，為應付將來美股既調整/熊市，我會採取以下策略：。

1.

如果三大持股 (QQQ/VOO/BRK.B)跌超過10%，就會開始動用手持現金開始買入。

跌到無晒現金就減持債劵去買入股票，正所謂養兵千日用在一時，債劵係美股組合既作用就係為左依個時候用。

2.

下年都會預期加息，我都開始增持VCSH (Vanguard短期公司債券ETF)而減持VCIT，希望令個組合減低加息既風險，同時keep到債劵佔成個美股20%。

3.

如果QQQ由高位跌超過20%，我會考慮開始買入TQQQ。

財務自由進度：1.64M / 10M (本來想今年破1.7M，咁既情況應該難D)

10/2021 股票成績

 

港股：

由上個月急跌到今個月平手，除左粵海投資(0270)外，其他回返唔少。

都係慢慢等，黎緊仲有幾次派息。

美股：

由上個月跌一跌又創新高。

對我依D唔識選股既人黎講，ETF就最適合，完全唔洗理會計資料。

選擇唔打低股市，而係擁抱股市。

後記1:

阿女開始trouble3，唔肯返學又唔肯訓覺，所有時間都比晒佢，所以無乜時間cut片。

今日都係抽少少時間先打到blog，希望catchup返啦！

大家比少少鼓勵，入去支持下小弟: 

youtube.com/channel/UCDXALsVD5ERT_Ptav4hMVCA?sub_confirmation=1

後記2:

前排話幫老豆買All Weather Portfolio，佢自己又想搞

咁我解釋個原理比佢聽，用邊間證券行，點匯錢等

佢之後彈一句：買左幾十年股票都未聽過有依D野，唔怪得D人唔識入美股。

我都係由零開始學，以前鬼知咩叫ETF，咩叫Firstrade

最重要係不斷增值，學海無涯，對自己有用的，無論金錢上同非金錢上，日子有功，將來都對你有好處。

財務自由進度：1.62M / 10M 

收息股VS增長股

之前睇過清流君對收息股VS增長股既睇法，佢既大約意思係增長股長期會跑贏收息股，唔係佢就會裸跑。

依樣中坑十分同意（包括裸跑），因為增長股有效利用自己既盈利再投資自己既生意上面，令自己賺到既盈利最高效既運用，幫股東爭取最大權益。而收息股賺取既盈利通常都搵唔到有效既地方去投資，所以都會去派股息比股東。

咁理論上係咪買晒增長股就可以呢?可能對佢黎講絕對係，但我認為一D年長人士同退休人士需要放更多比重落收息股上面。收息股帶黎穩定既現金流，唔會太受市場影響，就算股市大跌，佢地都照樣發放股息比股東，絕對係退休人士穩陣之選。當然，所選取既收息股絕對需要穩定盈利，就算經濟幾差都好都會賺到錢，收租股，公用股同必需品股就係好例子。

清流君佢另一個主張係每年中從自己既資產配置上套利做生活費，但真係咁容易咩?如果股市大跌一年，心理上仲可以接受，但跌一年呢?兩年呢?什至更長呢?睇住自己既資產縮水之餘仲要係入面提取生活費，對每一個人既心理壓力非常大。

另外，邊個圖案做新youtube channel個logo好D?

1

2

7/2021 股票成績

港股：

真係痴左線，個市可以連續2日跌千幾點，跌左大約4%。好彩我港股都係買收息股，成個星期都係跌左唔夠2%左右。而我今個月係大跌之前入左粵海投資（0270）同冠君（2778），過左個小股災都好彩無跌低過買入價，粵海仲升添！而我都會堅持繼續買收息港股，之前都有講過點解: https://oldmanlearninvest.blogspot.com/2020/12/2020.html

美股：

真係感受到乜野叫悶悶地贏。之前股市就算點調整都好照keep住月供，到依家都不斷創新高。但我都要不斷要remind自己，股市總會有大跌既一日，唔好依家賺得果少少而沾沾自喜，當股市大跌時要大膽d入市（雖然對班股神黎講我只係賺得皮毛）。今個月出bonus，會將9成bonus放入股市，實行time in the market。

財務自由進度：1.44M / 10M

曾經有一隻爆升股係我面前但係我冇去珍惜

信義光能　比亞迪及碧桂園服務染藍　成份股增至58隻

之前58蚊買過比亞迪(1211)，之後急跌到41蚊，最後中坑都以46蚊忍痛割愛。

點知比亞迪越戰越勇，最高升到278蚊，近期仲可以入埋恆指。

即刻諗到一首詩：

曾經有一隻爆升股係我面前，但係我冇去珍惜

到清左倉既時候先至後悔莫及，股市間最痛苦莫過於此。

如果個天可以俾機會我番轉頭既話，我會同佢講: Strong Hold!!!

如果係都要係呢份愛加上一個期限，我希望係一萬年。

其實依件事都比左我一個教訓：唔熟唔買

當我唔熟一隻個股果陣，佢升就無事，佢一跌就完全懷疑人生。

佢值唔值得依個價呢?佢係咪好唔掂呢?

好多唔確定既事令我對佢好無信心，有少少風雨令我諗緊仲hold唔hold住佢。

最後我都選擇分手，最後後悔莫及。

所以，港股黎講，我會揀一係好壟斷，一係好簡單易明既公司。

而美股就直接揀ETF，買成堆股票，輕鬆解決。

(依家粵海投資(0270)都跌得好犀利，仲跌出國指。但我清楚佢，又夠壟斷，所以暫時都係strong hold。)

[資產配置 投資策略] 讀後感

 一如既往，唔會概括晒成本書既內容，只係outline返中坑覺得有用既point: 

1. 投資組合入面，買入幾個零相關，什至負相關既資產。當一個資產急跌，零相關既資產唔會跟住急跌，有助平衡成個組合既風險。經典例子有股票加債券。

2. 每樣資產既相關性唔會永遠都相同。好似近幾年既股票同公司債就增強左相關性。

3. 關聯性0 to 0.3係零相關，-0.3 to 0係負相關。

4. 根據年齡同個人狀況去調整資產比例。例如你踏入中年，但有一份好穩定既收入，單身，無乜負擔時，你可以比同齡但有經濟負擔既人買入更多股票。

5. 黃金同商品唔係資產，唔會為你創造現金流。而且通常依d etf好高手續費，唔建議買入。 （依個好impress，我幫老豆整既All Weather Portfolio可能都會執執）

6. 唔止買入美國股票，買入更多世界性股票會更平衡風險。（不過其他外國資產真係好唔吸引，每年得5-6%增長🤣，但All weather portfolio入面可能會由黃金轉做世界股票）

7. 買入房地產etf會更平衡風險。（我做backtesting時將VNQ放係資產組合入面，比買入s&p500更低回報之外仲有更大波動性，依樣有待商榷。）

8. 唔好估未來大市既升幅而調整資產比例。（清流君都有講過，而且更加詳細。經過考慮之後，我會將現金買入更多股票。依個星期開始都逐步買入更多股票，首要目標係增加股票比例至50%。）

4/2021 股票成績

 

港股：

同恆指一樣，無乜太大變化。

粵海投資(0270)雖然大跌，但係佢頭3個月既業績做得幾好，收入按年增加85.7%，純利增長39.1%。加上佢個護城河真係好深(水資源+物業發展)，所以繼續放心持有。

美股：

有D增長，唔錯唔錯。

我既美股3巨頭(BRK.B，QQQ，VOO)都有超過4%單月升幅。其他都好悶，不過我中意，正所謂悶聲發大財，我又有更多時間去發掘更多額外收入。

中坑考慮緊將VYM，VYMI同SCHD套現，擺入VNQ同VNQI。因為外國著名FIRE Blogger FINANCIAL SAMURAI 有一篇文章講過，如果你仲有穩定收入，就不如將多D錢擺入增長股而唔係擺入收息股。因為後生時你仲可以承受到股市波幅，唔需要靠你既被動收入過日子。而且美股會扣30%股息稅，換言之依30%唔可以幫我錢滾錢，好唔著數。

港股都一樣，始終我成個港股組合都係收息股。就算每年有6-7%増長都唔夠快令我達到財務自由。等我諗到方案後再同大家講。

財務自由進度：1.36M / 10M 

有用連結: 

Better To Invest In Growth Stocks Over Dividend Stocks For Younger Investors

https://www.financialsamurai.com/better-to-invest-in-growth-stocks-over-dividend-stocks-for-younger-investors/

Jack Bogle: Should you buy Index Funds at All-Time Highs

 

依個月都係度諗，究竟繼唔繼續入市，比我聽到一句名言：Time in the market, but not to time the market之外，仲睇到依一後影片，究竟股價創新高時繼唔繼續入市呢?

1. 價格始終都會回歸價值，問題係價格會回落至價格水平，還是價值上升?

2. 最大的風險係你唔將金錢放入股市，而唔係因為少少波動。長期黎睇，今日既大跌日後睇只係好少既跌幅。

3. Compound interest is miracle and time is a friend <<<精簡到唔洗點解釋

4. 唔好比自己情緒影響，你永遠估唔到個市升跌。

5. 分散風險。買ETF可以消除你對揀股既失誤。

6. 堅持到底。

(作者一再強調依D建議係for被動投資者。其他自己選股既投資者就唔知適唔適用。)

1/2021 股票成績

港股：

今個月恆指升左唔少，但中坑今個月初已經放左所有盈富去換馬，雖然換馬D股票都升左唔少，但都唔夠盈富升得高。渣住既港股都係舊經濟股，食唔到太多既升浪，但今個月最後一個星期恆指跌左6%，我個港股組合都無跌得咁傷。

今個月粵海(0270)無啦啦跌左10%，去到13蚊水平，佢岩岩又同香港續約，所以我唔信佢有咩問題，就係13.22蚊入多1手(已經係組合第2大，所以應該唔會再入)。

越秀交通基建(1052)都跌左近10%，但暫時就唔會咁入貨，因為佢上次中期無派息，小心D好。

組合依3年都係得2%增長，好渣，雖然可以賴社會運動賴疫症，但賴黎都無用，要自己好好加油，爭取好D既回報。

(註：我既港股組合都係作收息用，係因為自己預期恆指既升幅會比以前減慢)

美股：

今個月決定加大股票月供額，至每個月既儲蓄額既50%，就係因為一句說話：Time in the market, but not to time the market。唔識估個市幾時跌，就由D錢擺入股市，比佢長年增長吧。

但今個月尾S&P500跌近4%，不過唔怕，其實我寧願再跌得勁D，我仲有好多現金可以慢慢入貨。

今個月開始會用bonus月供買入SCHD，VYMI，VNQ，VNQI，去建立收息及房地產組合。

財務自由進度：1.24M / 10M (同上個月無分別，因為今個月又交稅又交保險，已經用晒今個月既儲蓄 -_-!)

慢慢致富？唔係咁易既葉師傅

巴菲特願意這樣持續數十年地堅持，所以最後他成了超級富翁。亞馬遜CEO貝佐斯問他：「你的投資理念非常簡單，為什麼大家不直接複製你的做法呢？」巴菲特說：「因為沒有人願意慢慢變富。」

再反問一句，為什麼沒有人願意呢？

其中一個原因是有人覺得自己可以一夜暴富，以小搏大，以投機既心態進入市場，希望自己很快變富翁。但中坑今日想講既係第二個原因：我真係可以慢慢致富嗎？

以中坑為例，我係一個好急既人，永遠都想用最短時間得出結果。而用慢慢致富既心態去投資令我吃不消：「係咪真係得架？」「我走依條路，會唔會最後得個桔？」如果你唔係對自己投資既公司有足夠既信心，都好易胡思亂想。

講真，持有既股票中，本身好多都有信心，基本面都無乜轉變，但見佢一路跌一路跌，越來越無信心，但暫時基本面無變既股票，我仍然會keep住，希望以後我可以做一個「慢慢致富」既好例子。

比亞迪及匯豐給中坑的教訓

比亞迪同匯豐都係中坑好早時買入，不過又蝕住賣出。兩者之後各走極端：

比亞迪58蚊入，30幾蚊放，最後依家升到過百蚊，破新高。

匯豐均價連以股代息61蚊入，40蚊放，最後依家跌到32蚊，破海潚新低。

依兩隻股比中坑的教訓：不熟不買。

雖然我係工程界別，但我對比亞迪既技術完全摸不透。當佢跌到趴係度既時候因為認知不夠，所以放左。如果比我從新黎多次，我可能直接唔買，因為唔熟悉。

匯豐我就更加唔識，望住佢份財報，已經滿頭黑人問號，果時因爲睇落幾高息就買，完全唔清楚佢既賺錢模式。

霍華德最新備忘錄：科技股高估值有其合理性，美國經濟復甦至少要8個月

 霍華德最新備忘錄：科技股高估值有其合理性，美國經濟復甦至少要8個月

https://news.futunn.com/market/129469?src=3&user_id=1100729&auth_token=339295&clienttype=12&clientver=10.14.842&clientlang=1

種樹?不如種森林

 以前有一個講法，買長建等於種樹，比佢自我生長。

粒種子好大粒 (一手都要一兩萬)，要好辛苦先種到棵樹。

但到今時今日睇黎，依棵樹雖然出產既果實(股息)年年一樣，但越種越矮。

既然種樹咁辛苦，點解唔種個森林出黎呢?

種子細細粒易打理 (美股一股股咁買)，可以撒好多種子出去。

就算一棵不幸枯萎，仲有其他樹係度繼續成長。

雖然摘果實要比少少稅，但係每一棵樹都好健康，生得越來越高。

終有一日，你會種到成個森林出黎，比自己，比子孫享有。