2023回顧及展望

 可以先睇下中坑歷年回顧，睇下我依幾年有無咩進步

2022回顧及展望

2021回顧及展望

2020回顧及展望

港股

中坑港股持倉

港股overall growth -10.09%，上年係-6.45%，即係話今年跌左3.64%

而恆指今年跌16.7%，已經連續跌4年，雖然贏左恆指，但唔見得光彩...

今年開始用收到既股息買入香港電訊(6823)，應該比到我更穩定既現金流。

放左一部分冠君(2778)去幫領展(0823)供股，冠君(2778)真係好廢，以前貪佢有成個朗豪坊同花園街3號，疫情完左業績都無乜改善。從錯誤學習啦，買要買多資產既REITS，要搵機會放走佢。

如無意外港股每年比到我3萬蚊現金流，同上年一樣，唔會再注入新資金入港股，只用現存既倉位同股息買入收息股，選股條件係長期穩定派息同派息長期會有增長。

港股真係無咩好講...年年都咁跌，今次真係...

港股今年組合增長：-3.64% 

港股每年期望增長：5-10% (又又又不達標)

美股

美股組合

直債/ETD組合

話就話S&P500同NASDAQ今年都升左好多，但其實上年跌得甘既關係，其實兩個指數都只係接近歷史高位，所以我9估今年仲有機會升多浸。

今年美股做左D新既嘗試，睇落都唔錯：

1. 大量買入TQQQ同SPXL。7月開始無再買入VOO同QQQ，只買TQQQ同SPXL，目標係直到balance到個槓桿比率為2倍內。因為睇個好多數據都係話最好既槓桿比率為2倍，咁樣買雖然都幾大波動，可能股市太抗奮果陣會減低個比率。

2. 開始的起心肝喺IB開戶，然後買直債。Sofar依家都係買長期國債同短期公司債，用長期國債做一個好安全既現金流(國債5%呀大佬)，買定短期公司債可以收下息之餘，如果股市有咩波動都可以調返D資金去股票度。

因為依家我個組合含有槓桿ETF，所以我股債比會調整至6:4，以降低返波動同風險。

希望個資產配置大約係：

VOO 10-15%

QQQ 10-15%

BRK.B 0-10%

SPXL 15%

TQQQ 15%

債CEF (PTY+PFL+NMZ) 20%

直債/ETD 20%

點解想減持BRK.B比例呢?其實始終BRK.B係靠人去投資。巴菲特同芒格可以50年跑嬴大市呀，但50年後呢?擔唔擔保新一代掌舵人可以做到2位老人家咁犀利既成績呢?再者，其實過去15年BRK.B同VOO都係旗鼓相當(445% VS 485%)，所以可能巴郡神話再無過去咁犀利。

去年目標

今年真係一個懶人之年。書又睇少左，人又懶左。基本上上年既目標完成得好少，可惡！

上年目標：

1. Python，起碼學到基本野先 (學左唔夠一半基本野都唔夠)

2. 電子學上既知識，工作上用到，本身都有興趣 (有接觸下Linux，ROS同ESP32，ROS完全搞唔掂，ESP32玩到想整IOT，但工作太忙玩唔到)

3. 木工，之前幫屋企整書枱從而發掘到依個興趣 (幫阿女整完張床就無再掂過)

學習

今年做左一D改善身體既習慣，分別係沖凍水涼，168節食同冥想。懶得打佢地對身體既好處，我直接貼link啦。

沖凍水涼

168節食

冥想

而且今年又投入步兵行列，之前死都唔肯做返，但之後買左滑板車，送貨速度同舒適度其實都高左好多。送快左又賺多左。不過始終唔可以長做，因為用體力賺錢既收入係最低，最容易被取代既收入來源。

來年計劃

小弟真係對電子同編程有興趣，所以今年既目標基本上同上年一樣：

1. Python，上晒成個基礎課程先

2. 電子學上既知識，想玩ESP32，做到一個voice assistant既IOT

3. 想學期權並真係執行，只係做short黎掙現金流

最終目標

每年寫一次去激勵自己。

退休目標年齡：40歲 (仲有3年時間)

退休預計年齡：43歲 (仲有6年時間) (註：用financial freedom calculator計算)

財務自由進度：23.1%(上年16.1%)

2022回顧及展望

可以先睇下中坑歷年回顧，睇下我依幾年有無咩進步

2021回顧及展望

2020回顧及展望

港股

港股overall growth -6.45%，上年係2%，即係話今年跌左8.45%

比起恆指跌左15%既成績更好，其實組合好多股票都跌得低過恆指，但主要係一隻新鴻基地產(0016)救全家(+13%)同埋組合入面接近5%既股息先至可以頂一頂。

計埋今年，恆指都3年連跌了，最多由高位跌超過50%，究竟恆指幾時先跌完呢?無人知。幸好，我買既港股所有企業都係高現金流既公司股票，而且業務穩定，每年都派到息比我。今年都有兩萬幾股息袋袋平安，而我將今年股息再用黎再投資，得出黎既股息率會比之前更高。

年頭買左VTECH(0303)，但感覺唔係太壟斷，所以好快賣走左。

今年都無再買新股票，因為懶去研究其他行業，其實眼中有心水的，例如江蘇寧滬高速公路(0177)同中移動(0941)，兩個都係護城河深既企業，希望搵到時間研究啦~

同上年一樣，唔會再注入新資金入港股，只用現存既倉位同股息買入收息股，選股條件係長期穩定派息同派息長期會有增長。

港股今年組合增長：-8.45% 

港股每年期望增長：5-10% (不達標)

美股

今年係美股方面做左唔少改動去完善個組合：

1. 由債劵ETF轉左買直債同債劵CEF

睇完風兄的<<懶系投資法2>>對債劵ETF既睇法後，就放棄買入債劵ETF，轉左買直債同債劵CEF。

參考文章：嘗試從債劵部分改善美股組合

但因為唔清楚加息同債市既關係，年初買入唔少ETD(好多ETD都係長債)，而唔去接觸短債，搞到債果方面都幾損手爛腳。不過幸好，我買既所有ETD都係投資評級，理論上只要間公司唔執笠，我都可以唔理佢，一路收息，直到到期日。只係機會成本問題高左D啫，當買個可以彌補既教訓。

CEF就買左PTY同PFL，每個月派息就再投資，由佢自我膨脹，派息增多之餘又可以等減息再升。

2. 買入槓桿ETF

參考文章：無斬倉風險既簡單槓桿方法：買入槓桿ETF (LETF)

要等10年先可以財務自由既時間實在太長，如果可以受少少風險既話，咁就不如「用危險嘅方法玩安全嘅嘢」，即係買入槓桿ETF(LETF)。LETF可以輸到變0，但係無斬倉風險的話，我認為可以配置一部分資金入LETF做槓桿。

現時買入TQQQ同SOXL，暫時各佔組合1.X%左右，視乎情況加倉。

3. 少改動：清倉VNQI

我個倉有少量VNQI，本來打算買黎build up現金流，但依幾年派得又少又唔穩定，所以清倉。

學習

今年工作同湊小朋友方面都好累，都好少去學習一D新既野。尤其youtube，基本上都放棄左，其實有一段片錄左好耐但都係懶得去剪。

年中有研究過乜野係期權現金流，但好似都幾高風險同埋個本要夠大，所以就擱置左。

亦都有睇<<掌握市場周期>>，主要係用加減息同其他人情緒去判斷個市，都仲未掌握得好好。

唯一真係努力研究左出黎並且學以至用既野係CEF同埋LETF，可以投入組合入面。

去年計劃回顧

1. 學習槓桿買債 <<< 用CEF去做另類槓桿
2. 發掘優惠資源 <<< 有去搵下coupon之類，但唔係幾努力去搵。近期搵到由電話月費轉做儲值卡plan，實驗成功後share比大家知。

3. Catch up返拍youtube片 <<< 直接收左皮😓

來年計劃

除左繼續研究投資同額外收入外，想學返D自己有興趣既野多D：

1. Python，起碼學到基本野先

2. 電子學上既知識，工作上用到，本身都有興趣

3. 木工，之前幫屋企整書枱從而發掘到依個興趣

最終目標

每年寫一次去激勵自己。

退休目標年齡：40歲 (仲有4年時間)

退休預計年齡：43歲 (仲有7年時間) (註：用financial freedom calculator計算)

財務自由進度：16.1%(上年17.2%)

我不喜歡錢，但我喜歡自由

依排重睇返<<掌握市場週期>>。之前都睇過一次啦，不過道行未夠，好多都唔明。

點知再睇返，再度雲遊太虛，睇得唔太入腦，反而一路睇一路諗公司野。

其實我中意自己既job nature，我中意做工程，就算放工之後我都中意睇工程既野。

我都覺得自己痴痴地線，放工睇埋依D數

由始至終，我對股票真係無太大興趣，而我又無諗過自己發達，點解我仲要花咁多時間去睇書?唔比自己去打波?去陪屋企人?去打機?

我研究股票唯一既原因：我愛自由。

生活入面有太多限制，尤其返工，完全限制我既時間，加上我好唔中意早起身，返工又遠。我成日都好憧憬自己唔洗返工，買到一間大D既屋(香港唔得架啦，第日應該移民)，係屋企整一個私人工場同私人gym房，最好近籃球場比我射下波。

我既dream room😎

如果我一路返工唔投資，我諗到60歲退休先可以做自己想做既事，到時可能唔夠精神去做自己中意做既事。我想盡早過自己既生活，我想自由，而我可以自由既做法就係有足夠既現金流比我好好生活，提早退休。

所以我唔喜歡錢，但佢係令我自由既一個好好既工具！

中坑youtube channel

中坑facebook

[窮人都可變富人] FIRE運動中改變我的4個思維 by中坑

 

2021回顧及展望

可以睇返2020回顧及展望重溫上年講過D乜
港股

連同股息既話，今年港股有2%增長。

相比恆指，連同股息都跌左12%既話，算唔算大幅跑嬴大市😒

今年操作主要係新買入建設銀行(0939)，增持領展(0823)同粵海投資(0270)

放晒盈富基金(2800)同越秀交通(1052)，希望增加股息上的現金流。

加大左粵海投資(0270)既比例，成為最大既持倉，但就結果黎睇似乎做錯(年內跌左30%)

但作為現金流超高既公司，無乜好怕，希望下年升返。

年尾新買入建設銀行(0939)係希望有多D唔同既收息行業，加上有阿爺撐住，可以適量持有。

放晒越秀交通(1052)係因為佢今年派好少息，唔可以持續穩定派息比小股東既公司唔要都罷。

一直都想買公路股作為另一個收息行業，江蘇寧滬高速公路(0177)列入候選名單。

同上年一樣，唔會再注入新資金入港股只用現存既倉位同股息買入收息股，選股條件係長期穩定派息同派息長期會有增長。

港股今年組合增長：2% 

港股每年期望增長：5-10% (不達標)

美股

反思過之後，跟上年策略有變

唔會估股價過高定過低，實行股債80:20同埋TIME IN THE MARKET

月供ETF都唔會話跑唔跑嬴大市，每月供錢每月都溝淡利潤。

唯一覺得自己做得唔好既係唔貫徹始終，年頭無完全做到TIME IN THE MARKET

留左一筆少量現金。搞到回報少左D，依家更加唔敢貿然擺錢入市。

算啦，依家一出糧，扣除開支後都將所有錢供晒股票同債劵

之前剩低依筆錢留返黎跌市時入一入。

今年都買左幾隻BABY BOND作為學買債既入門。

開埋IB account，之後再睇下有咩債可以買，希望債劵持倉方面減少D債劵ETF。

預計明年加息，所以都會將債劵ETF入面既比例變成VCSH:VCIT = 1:1

今年資產增長：38.4%

學習

由於主要持倉都係ETF同埋實行TIME IN THE MARKET

令我去研究市場同研究個股既時間少左好多，但咁樣即係話我既資產增長只會穩步增長。

為左加速我財務自由既時間，我就想今年開始做生意。

所以今年都睇左唔少關於做生意既書，最深刻係Hea富學

佢既主旨係做生意要有槓桿，有被動收入，有爆炸性。

而我諗到既係做youtuber去分享自己步入財務自由既每一步。

但估唔到既係做youtuber所需要既時間係非常多。

寫稿，錄音，剪片，SEO，每一段片都需要10個鐘去完成。

今年公司又好多野要做，加上需要陪伴小朋友，所以都無乜心力繼續去出片。

一路都想catch up返，希望來年做到啦。

另外，今年睇多左財務類型以外既書去增值一下自己:

<<原子習慣>>

<<超速學習>>

來年計劃

1. 學習槓桿買債 (希望債劵部分增加利潤)
2. 發掘優惠資源 (仲未有好大方向，主要係搵更多免費，特價之類既source)

3. Catch up返拍youtube片

最終目標

每年寫一次去激勵自己。

退休目標年齡：40歲 (仲有5年時間)

退休預計年齡：43歲 (仲有8年時間) (註：用financial freedom calculator計算)

財務自由進度：17.2%(上年12.4%)

從衣食住行中點樣慳錢?

 

FIRE運動除左注動收入外，減低消費都係關鍵要素之一。

越洗得少錢，你距離FIRE又近一步。

睇下平時中坑點慳錢?

買隻金雞生金蛋？

童話故事入面有金雞生金蛋比主角過幸福既生活。現實可唔可以買一隻金雞，源源不絕咁生金蛋比我地用呢？

而金蛋又可唔可以再孵隻金雞去生多d金蛋呢？

希望大家睇完依條影片後比多D意見！

9/2021 股票成績

 

港股：

我真係開始對港股無耐性。

我當砌個港股組合慢慢收息都算，之後唔同國策下，搞到今次地產股急跌，成個港股組合由正增長一個月內跌到負增長。

其他國家係疫情後個市都做得唔錯，唯獨恆指同國指係排最尾。

恆指同國指排最尾

但投資者最忌無耐性，我買既所有股票都仲比過去平均股息率為高，加上佢地大部分都keep到同過去盈利差唔多，希望之後會好D啦。

最多忍到過晒個疫情或者搵到更好既投資機會，如果唔係都繼續持有先。

美股：

美股都跌左幾個%。

但依個股票，現金同債劵既比例下都無乜好怕。隨時bump多D cash入美股都仲得。

睇落我既美股組合成長好似好少，但同港股唔同，我每個月都月供大部分收入落美股果度。

美股戶口總值唔算太大，每次月供都好明顯地溝淡個盈利。

希望美股戶口總值越來越大，比佢多D時間增長。

財務自由進度：1.50M / 10M (比上個月跌左...)

後記:

今晚會出第二集中坑FIRE財務自由真人騷，希望各位多多捧場！

中坑的Youtube channel上線了！

千呼萬喚！中坑既Youtube channel上線了！

依個Youtube channel主要係講Fire財務自由運動。唔單止share投資既經驗，仲會share埋慳錢同多重收入既心得！亦都分享中坑經歷緊FIRE既路途上既一點一滴！

而第一集就係講乜野係FIRE財務自由，希望大家多多支持！比個like，share同subscribe依個channel！

Email: oldmangofire@gmail.com Youtube: https://www.youtube.com/channel/UCDXALsVD5ERT_Ptav4hMVCA Facebook: https://bit.ly/3ubtsGS

4/2021 股票成績

 

港股：

同恆指一樣，無乜太大變化。

粵海投資(0270)雖然大跌，但係佢頭3個月既業績做得幾好，收入按年增加85.7%，純利增長39.1%。加上佢個護城河真係好深(水資源+物業發展)，所以繼續放心持有。

美股：

有D增長，唔錯唔錯。

我既美股3巨頭(BRK.B，QQQ，VOO)都有超過4%單月升幅。其他都好悶，不過我中意，正所謂悶聲發大財，我又有更多時間去發掘更多額外收入。

中坑考慮緊將VYM，VYMI同SCHD套現，擺入VNQ同VNQI。因為外國著名FIRE Blogger FINANCIAL SAMURAI 有一篇文章講過，如果你仲有穩定收入，就不如將多D錢擺入增長股而唔係擺入收息股。因為後生時你仲可以承受到股市波幅，唔需要靠你既被動收入過日子。而且美股會扣30%股息稅，換言之依30%唔可以幫我錢滾錢，好唔著數。

港股都一樣，始終我成個港股組合都係收息股。就算每年有6-7%増長都唔夠快令我達到財務自由。等我諗到方案後再同大家講。

財務自由進度：1.36M / 10M 

有用連結: 

Better To Invest In Growth Stocks Over Dividend Stocks For Younger Investors

https://www.financialsamurai.com/better-to-invest-in-growth-stocks-over-dividend-stocks-for-younger-investors/

不創不創還需創(業)

 今日講下股票以外既野，想講兩樣野：

1. 上星期睇完物理治療，阿sir話可以打返波同做返foodpanda步兵。而之前睇左一本書「超速學習」，其中一個做法係重覆練習自己既弱點，中坑打波弱點係右手上籃（中坑係左撇子）同射三分，我就集中苦練依兩樣。一開始一定係好痛苦，好似handicap咁手腳唔協調，但我相信只要克服自己弱點，一定可以有大躍進。「超速學習」讀後感會係另一篇文章再講。

2. 隻腳好返就做返Foodpanda步兵，兩晚做左6個鐘，賺$450。每次做完對腳都好攰，而咁攰既我開始get到一d野：我堅持做步兵既原因係比自己覺得真係努力去賺外快而唔去創業既藉口：「我好努力去賺錢架啦，創業依d野之後再搞啦。」咁樣下去唔掂，我已經3個月無認真處理創業既問題，要cheer up返。

3. 點解我好想創業呢？要創造被動收入主要有兩招。第一係你買入資產，即係股票/債劵/房地產。依樣不嬲有做開，但我既人工基本上都定好左，而我買etf都唔會預佢爆升，所以只靠買資產既話，無得再加快財務自由既進度。而第二係創造資產，即係唔洗用錢或者用好少錢去建立一個生財工具，例如上網賣野。但創造資產既共同點就係要多人識你，網上賣野、YouTuber、聯盟營銷，通通都係要出名先得，而依樣係我創業上既一大障礙，亦都係成日對創業卻步既原因。而中坑今年目標有2個，一個係識選債買債，一個係創業，前者順利進行中(已買入5隻ETD)，創業仲係未有太大方向住，但做完步兵後既辛苦成為我創業既動力，加油！

3/2021 股票成績

 

港股：

依個月恆指跌左2.13%，而我既組合跌左3.3%

主要問題係越秀交通基建(1052)派好低息，股價1日跌左10%，我都因為佢業績差，低派息而清佢倉，只係賺好低既差價。

而粵海投資(0270)公佈業績後，一星期都跌左10%。業績報告話佢盈利跌左10%，主要資本性開支有所提高，但佢總資產提高唔少同佢派息都keep住有增長，我依然先持有，再研究一下會唔會增持啦(應該都唔會住)。

有意再買多一隻股票收息，去填補越秀交通基建(1052)無左的派息。暫時只有置富產業信託(778)納入考慮之選，搵多D時間睇下仲有無其他股吧。

又到港股年結，3年6.45%，每年1.87%增長...真係差...

希望今年港股真係過左熊市好D啦~

美股：

上個月QQQ跌左10%，所以用返之前既策略，跌10%就額外供多D，再跌再加碼。但跌完就升返幾%，唯有再等。

另外，台灣youtuber清流君比較定期定額同一次性投入，結果竟然係一次性投入會比較著數。顛覆左我之前既諗法。可能要對我既月供方法再從長計議。

財務自由進度：1.32M / 10M (今個月唔係太好，只有唔夠1萬既增長😐)

多重收入的重要性 2

之前有講過中坑有做Foodpanda黎增加自己既收入，但係我依排整親右膝，上落樓梯都痛。差唔多成個月都未好返，無得打波之餘又唔可以做Foodpanda，每個月都無左2000蚊。😓

好彩Foodpanda唔係正職，而係兼職。如果我做Foodpanda或其他體力勞動作為正職既話，依家都幾頭痕。

近排忙住湊女又無得做運動，搞到無咩心情去開發副職，連睇下書都無心情，希望之後積極D啦~~~

針灸都無用

多重收入的重要性1:

https://oldmanlearninvest.blogspot.com/2021/01/blog-post.html

另一個被動收入：寫Blog

其實中坑一開始寫依個blog係為左記錄自己所有學過既野同每一次做決定時既諗法，點知寫blog原來都可以賺收入~

有一日睇止凡兄個blog，佢話依排整左D廣告係個blog上面，當係另一個被動收入來源。咁我就膽粗粗有樣學樣，試下將廣告放係blog果度。

點知原來係超級煩，我半年前申請左，認證左成半年都話認證中。個網上教學超唔user friendly，打去香港google問又無反應。搞完一大輪终於認證到，點知話我內容空泛唔比認證。咁我再打一兩篇文又成功認證...=_=

咁最後都成功搞定左，暫時既收入係...HKD 5仙💀

不過依D都係慢慢累積架啦~都比到我多D動力寫blog👊👊👊

中坑多重收入列表：

主動收入：

1. 正職

2. Foodpanda (都唔會做得多，做既原因都係要提醒自己賺錢好辛苦，唔好亂洗錢)

3. Freelance (一年都唔知有無一兩次...)

被動收入：

1. 股票 (港股+美股)

2. 債劵 (Bond ETF + ETD)

3. 小生意 (賣畫。得閒去睇下：https://www.instagram.com/decorholichk/ )

4. 寫blog (https://oldmanlearninvest.blogspot.com/)

多重收入：Foodpanda步兵初體驗

今日試多一種唔同嘅主動收入：做foodpanda外賣步兵。

申請做foodpanda步兵真係非常麻煩，好多手續，又要去尖沙咀攞衫同袋，好唔user-friendly。

但係成功申請後就係唔同既世界，係一個非常好嘅體驗。今日中坑用一個鐘頭嘅時間送左4個餐，賺到大約$120。而所有送餐嘅位置都係好近屋企，所以其實都好易做。最得意嘅係我送其中一個餐去一個比較富裕嘅屋苑時，屋主話唔使找錢之餘仲比多封利是我。😂

雖然做步兵嘅技術含量好低，送外賣都可以賺到咁高嘅收入，但又真係好辛苦，我係一個鐘頭入邊已經行咗4公里，幾考體能。

可能你地覺得一個鐘120蚊真係濕濕碎，但我既目標係盡量短時間得到更多收入，再將依啲主動收入買入有現金流嘅資產，慢慢累積財富。

第一個客就有利是~

點解我要爭取多重收入：

https://oldmanlearninvest.blogspot.com/2021/01/blog-post.html

多重收入的重要性

 

52蚊買五送一，好抵！

講正題前，想share公司樓下有個promotion，日式飯盒買五送一，送果個飯盒又會送一張優惠劵，變相以後食變成買四送一，平均每個都唔洗$40。有時同事唔要張劵又會比我，公司附近全部都好貴，係無帶飯之外既好選擇！

講返正題，老婆今日同中坑講佢有個同事既老公比人裁員，雖然生活仲可以支持住，但收入會低一截，心情好差。我即刻諗起如果人只有一個收入，當被炒或者因健康問題而失去依個唯一收入，下場都幾頭痕。

做事有時都會有Plan A Plan B，點解收入唔可以有Plan A Plan B呢?當做一個多重保險，一開始其實唔洗太介意係唔係被動收入(例如股票，債劵)，可以係補習，做生意等等。可能一開波會好攰，無晒時間休息，但一路將依D主動收入不斷拎去買入資產，做成一個資產增值或者收股息，相信日後可以用錢買時間，由窮忙族變成hea富族。

2020回顧及展望

港股

依一年對香港前景感到好迷惘，唔會覺得港股以後有太大增長，所以唔會再將額外資金擺入去，任由之前已經擺入港股既資金滾存。而且會逐步將資金移向收息股，令港股變成一個收息組合，因為香港唔收股息稅，比起美股要收30%股息稅黎講，現金流會高好多。希望依個決定可以為將來提供一個好穩定的現金流。

現時組合太偏向地產股及公用股，風險較大，所以想將一部分資金移向其他行業。今年年尾考慮左好多唔同行業，有電訊，公路，物流等，最後都係揀左公路股，因為公路股係結構性壟斷既行業 (個人唔中意品牌壟斷既行業，就算依家做得幾壟斷都好，終有一日如果服務做得唔好，或者有新技術代替既話，護城河好易就被摧毀)，希望可以揀多一兩個行業去投資。

公路股上我會先揀越秀交通基建 (1052)，第一佢分佈比較分散，第二佢往年有穩定股息增長。但佢今年中期唔派息，有D卻步，所以唔會入得太多住，等佢全年業績恢復派息會再入返多D。

仲有中坑想慢慢將盈富所佔組合減至10%，什至更低。因為股息率比起收息股實在太低 (最多~3.5%)，我又唔覺得會有高增長，所以會揀個時間減持。

港股今年組合增長：0% (唉...)

港股每年期望增長：5-10% (主要係股息)

美股

上年研究左好耐，今年先第一次玩美股。

基於我既英文真係好屎，而且對美國唔熟悉 (連美國都無去過)，所以暫時只會入ETF。而且我會參考Benjamin Graham既建議，會以市場既平貴程度進行資產配置：

市場亢奮 - 股票25%，債劵75%

市場合理 - 股票50%，債劵50%

市場悲觀 - 股票75%，債劵25%

ETF方面，我揀左QQQ (科技增長)，VOO (整個美國市場)，BRK.B (其實佢唔係ETF，但係佢包含全球優質股票，所以我揀左佢)作股票組合，比例為1:1:1。而債劵ETF本身我係揀BND(國債+企業債)，後來我揀左VCIT(中期企業債)，因為佢入面最低評級既債券都係BAA (已經好高)，而且中期債劵對利率不太敏感，帶來穩定增長之餘又可以避險。

我認為現時市場太過亢奮，我會先逐步將VCIT佔比加大至50%，同時保留一定現金，如果市場大跌會進一步投入股市。

如果有一D額外收入 (例如雙糧，bonus)，同老婆商量後，會入返D收息股，暫時我會揀VYM，VYMI，VNQ (本身想揀埋VNQI，但今年唔知點解無派息)

暫時依個策略好適合我，依個組合唔需要我太多時間去睇年報同分析個股，比我多D時間去湊小朋友同有空間去搵機會增加額外收入 (小生意，買baby bond等，一陣再講)。

美股今年組合增長：18% (主要因為3月大跌果時入左唔少)

美股每年期望增長：10-15% 

學習

今年睇左幾本書，最深刻都係下面依幾本書 (依度唔寫書評啦，之前寫過)。

漫步華爾街 (ETF神書)

富爸爸投資指南（上，下）(教我對資產既定義同推使我做一下小生意)

FIRE 財務自由 (推使我做小生意，做副職同如何省錢)

現金流為王1, 2 / 懶系投資法 (教我如何買債券同槓桿)

來年計劃

1. 學習如何買債劵。先學習買ETD開始。

2. 做下小生意 。主要係做賣野，希望做到另一種被動收入來源。

    A. 我有少少3D打印技術既知識，所以想賣用3D打印做既精品，有興趣可以睇下以下連結：

          https://www.instagram.com/fayshomeware/

    B. 我都好中意唔同NBA球星，所以都賣下掛畫

最終目標

每年寫一次去激勵自己。

退休目標年齡：40歲 (仲有6年時間)

退休預計年齡：43歲 (仲有9年時間) (註：用financial freedom calculator計算)

退休儲蓄目標：12% (漫漫長路...)

        

一個唔錯既入市策略

 Source:

https://www.madfientist.com/my-portfolio/

個blog主來自美國，係其中一個好出名既fire blogger。

依篇文其中一段值得參考，大家可以自己fune tune返：

I knew that I had $x in cash that I’d be willing to deploy and I had $y in bonds that I could sell (to buy more stocks) so I determined the max I could add to my stock portfolio as stock prices decreased and I split up my contributions.

I set up buying opportunities at -15%, -20%, -25%, -30%, -35%, and -40%. And instead of buying fewer shares as the market dropped, as I did in 2007/2008, I planned on increasing my purchases at each stage.

So I determined a value $x where I could invest $x at -15%, $1.5x at -20%, $2x at -25%, $3x at -30%, $3x at -35%, and $3x at -40%.

If the market ends up going below 40% the February highs, that’s when I start selling even more bonds to buy stocks.

投資策略稍為改動

近依兩個星期中坑一口氣睇完富爸爸投資指南(上)(下)，令中坑對投資又有另一想法，繼而將投資策略(或者叫財務自由計劃)再稍為改動一下。

(富爸爸投資指南(下)太高層次，好多部分係講點做終極投資者，意思係話要開間公司上市，將股份賣出去賺大錢，我又唔太想去到咁，我只需要有足夠被動收入唔洗做就得）

1. 用工餘時間做副職去賺取額外收入，而副職係要創業

作者好強調要有多重收入。而我只有股票收息做被動收入，計過複利息增長率，都唔可以40歲前退休，所以我想在工餘時間賺更多錢。

另外作者強調如果要做副業，必須係要開公司先得，學習用B象限（businessman)既角度諗野，而唔再係停留於E象限（employee)同S象限（self employed)既範圍。

其實我有一兩個生意idea，本身我都唔諗住做，睇完依本書之後，下年其中一個目標應該就係開公司做生意

2. 用自己既公司支付比自己

依個有d深奧，大約係同減稅有關，到開左公司再睇下自己明唔明。

3. 富人思維係低收入，高支出

高支出係指盡量用現金去買可以真正資產

記住係真正資產，例如係產生現金流既資產（收息股，債券等），而唔係一路令你負債既資產，例如自住樓。咁我即時對買樓有興趣，但唔係香港樓，係外國物業。得閒睇Hea富學研究下。

而作者亦建議我地draft一份收益表及資產負債表，令我地清楚自己財政狀況同現金流係點樣。

中坑未有退休目標前：

中坑有退休目標後既轉變：

中坑之後想做既轉變：

照依家既複合增長黎講，想40歲退休前既目標都好難達成(最快都43歲)。希望作出不同改變，令到儲錢退休既進度可以加速。

中坑學慳錢 - 住篇

將個主題改做「中坑學慳錢」，原因中坑覺得仲有好多方面可以慳錢，我只係岩岩開始學習，有待我去探索。

下面link睇返衣同食

衣: https://oldmanlearninvest.blogspot.com/2020/09/blog-post.html

食: https://oldmanlearninvest.blogspot.com/2020/09/blog-post_16.html

今日講既係「住」

依方面真係無乜野可以慳，唯有講下過去住樓經驗。

岩岩結婚，無錢買樓，同老婆出去租屋。一個細單位$8000，雖然已經好平，但1年都白白洗左10萬，好唔划算。諗住買樓，太貴又買唔落手。感謝主，抽到白居易，用一個好平既價錢買到個中型單位，月供唔洗$9000，輕鬆供樓。新居又近兩家人，定時返去食下飯，又慳一筆。

水電煤方面，依3樣我都無諗過方法點慳。頂多用下慳電膽，唔用既電器熄左佢之類。之前都儘量唔開冷氣開風扇，但小朋友怕熱，無計。或者買中電（0002）同粵海投資（0270）對沖下。🤣

小記：點解唔買煤氣做對沖？有機會再講。