今次會同以前不一樣嗎?

今個星期五最大的新聞就是國安法。消息一出，恆指一天內暴跌近1300點，創歷史新高。大市認為很多外來投資者撤資，紛紛要錢唔要貨。

但事實會唔會係咁呢？97回歸，23條，很多政治事件本身好多人都看淡，但最後香港都係不斷上升。但"今次會同以前不一樣嗎?"

"今次會同以前不一樣" 係投資上的金句。當每個人都覺得係咁的時候，就係轉勢的開始。

希望今次的 "今次會同以前不一樣" 能再次被打破。
祝福香港。

最後送上Howard Marks的金句：

「如果你在之前沒有經歷過，你不能說你知道事情將會如何發生。四個問題 （流行病、經濟緊縮、油價崩潰以及美聯儲/政府的應對）一次性同時出現讓預測變為不可能。除了獨立理解四個問題的困難，我們無法確認它們將如何互相影響」。

註：
星期五(22/5/2020)如常月供。
冠君(2778) 1000股@ $4.05 (其實係早上暫停唔切月供...)
本來都有月供BRK.B，但證劵行(致富)好似無幫我入，星期一問下果邊先 (最後入左)

14/5 買入巴郡(BRK.B)

14/5 買入巴郡(BRK.B) 8股@167.8

原因：PB<1.1

近期巴郡沽晒所有航空業股，並承認之前買入航空股係一個錯誤。
而且之前股市大跌期間都無買入任何股票，令股價暫時受壓

但中坑聽到巴菲特同芒格1句說話好深刻：
因為我們的股東的90%資產都放在巴郡上，所以我們要對自己的投資十分謹慎(類似啦)

與其在自己不熟悉的美國市場選股，不如選個合適既人幫自己投資。
情況似買ETF一樣，不過有人幫你選股。

(但依段時間表現麻麻，我都有D恐慌，入8股算...)

討論手持股票護城河，隱憂及轉捩點 (港股篇)

0002 中電控股

護城河：
1. 九龍新界壟斷性賣電
2. 不管經濟好壞，人人都要用電
3. 除了香港，仲有內地，台灣，東南亞，澳洲，生意分配世界各地

隱憂：
1. 香港收入受到自己的資產大小影響
2. 澳洲業務做得唔好

轉捩點：
1. 東南亞及印度會否因為今次貿易戰同肺炎，令好多工廠移向當地?


0016 新鴻基地產

護城河：
1. 全港最多優質商場，如：APM，沙田市中心，YOHO MALL
2. 內地既物業都非常優質
3. 賣既樓都普遍認為係高質

隱憂：
(都無乜)

轉捩點：
(又真係無乜，好平穩咁增長)


0388 港交所

護城河：
1. 所有香港股票買賣都要經佢手，已經係屈機
2. 內地同外國資金流出都靠佢

隱憂：
1. 近來的香港運動令外國唔敢流入資金到香港，唔知會唔會係長遠


0823 領展

護城河：

1. 全港最多民生既商場

2. 經濟好與壞，人人都要買生活必需品

隱憂：

1. 經過武漢肺炎後，究竟會唔會越來越多人偏向網上購物?

2. 仲有唔多商場可以翻新作資產增值，咁佢既成長會唔會減低呢?

2778 冠君

護城河：

1. 兩幢超優質企業 (朗豪坊+花園道13號)

隱憂：

1. 經濟差時會好受影響

2. 資產分配好危險，其中一幢有問題就危險

諗到會update下

股票成績 (4/2020)

港股：

4月頭匯豐宣佈不派息，即刻換馬中電，一個月後證明應該無做錯到。

今個月都慢慢升返，升到少過5%虧損。
但5月第一個交易日恆指大跌1000點，跌到依家大約8% (上圖為當日的截圖)
無乜特別，如果再跌先買，橫掂現金比例唔健康 (應該要25%現金)，只係月供左1手領展。
想買就可能買冠君，有6%息。

冠君除淨左等收息
港交所做左以股代息，5股再加散紙HKD108.48。
盈富中期息得HKD0.09，同上年同期既HKD0.15差好遠。

美股：

都係月供，但將VGT轉左QQQ去月供。
美股接近合理水平，得BRK.B仲係抵(PB~1.0)
可能只係月供BRK.B 2-4股，睇下點先，可能大跌就買多幾股。

學習：

都係對資產配置感到疑惑，究竟股債點分配好?
債ETF每年既收息大約3%，仲要扣30%稅，低得可憐。
再努力D學買ETD? 定係擺現金做活期算呢?

{財務自由，提早過你真正想過的生活}

依本書的作者教大家如何從月光族教成可以提早退休。
佢講既好多方法雖然係美國先適合(例如遙距工作)，但仲有好多方法好inspire到中坑

本書作者提及有4種收入 (括號是中坑的處境)：
1. 正職收入
(好彩有一份穩定的工作)
2. 副職收入
(都有freelance做下，不過一年得一兩次。而且有時都有問卷調查，一次都有幾百蚊)
3. 生意收入
(作者強調唔洗辭左份正職去做，而係放工時間去做。而佢既生意收入等於佢正職既40%！！！我初步就去carousell賣產品比人。希望可以做多D方面既收入)
4. 投資收入
(作者強調佢一有閒錢就將錢擺入股票市場同債劵，而無選擇入貨時間。因為佢深信美國股市平均每年都有7%增長。而我希望將資金擺落香港股票作收息之用，美國股票作增值之用。而美國股票暫時只會買指數基金，因為唔識買個股住。)

至於怎樣慳錢，作者說每個人的主要支出是食，住，行
食方面，返工時我都係盡量帶飯。如果假日要出街食果陣，我通常都會揀早餐時段或者下午茶時間，因為比起正餐平好多。
住方面，無乜特別，因為都係供樓。跟作者唔同，佢係盡量搵平既地方租。
行方面，對於搭開巴士既我應該好難再減。

而作者都有教其他方法慳錢。例如買日用品時可以買家庭裝，需要某樣野時嘗試交換/借去代替買，真係要買果陣同圍睇下有無優惠劵。

最後，我想提及作者講既一個好方法：每當你見到想買的東西(主要係奢侈品)，先冷靜24小時，如果過左24小時仲想買既時候先買，避免衝動。

中電2019全年業績

1. 香港可准許回報率由9.9%降至8%，收入剛剛好反映出來
2. 印度及澳洲盈利大跌約50%，東南亞及台灣則大升106.8%
3. 總盈利大跌65.6%，主要是因為澳洲撥備減值。如果只計算營運盈利的話，每股盈利大約為$4.4，共花了86%去派息。

香港

准許回報率由9.9%降至8%，但未來15年都有穩定收入。而且資產大了，回報也可以升高。現在中電都在香港繼續加建不同的發電站，所以日後也可以繼續增加收入。

而且，我相信未來電動車一定完全佔領所有燃油車(香港依方面真係好慢...)，加上香港天氣越來越熱，香港用電量日後絕對會增加。

中國內地

無乜特別。

印度

中電集團所佔營運盈利較去年減少，這是由於Paguthan電廠的購電協議於2018年12月屆滿後， 電廠於2019年期間並無錄得可觀的發電額度，導致營運虧損。此外，集團於2018年12月向加拿大退休金 管理公司Caisse de dépôt et placement du Québec （CDPQ）出售中電印度40%股權，亦攤薄盈利收益。

自從貿易戰後，好多廠都由中國移去唔同地方，作為超多勞動人口的印度，我相信好多廠商會移去印度設廠。

東南亞及台灣

中電宣布《氣候願景2050》修訂版，承諾不再投資新燃煤發電資產。因此正退出越南兩個舊有燃煤電廠項目的發展。

希望中電再發展越南的輸電資產。跟印度一樣，越南都係廠商想設廠的地方。

澳洲

澳洲係我最擔心的地方。雖然澳洲零售業務只作一次過減值，但看來跟同業的競爭都頗激烈。

4/2020 股票成績

港股：

3月大跌市，港股倉跌左10%
而同時中坑增持同入左第1次買既股
分別增持冠君，新增中電同領展。
而冠君其實係風眼位，因為零售好受影響，下次遇上同樣情況會睇定D先

怒沽匯豐後，手頭上的股票類型太少。
除左盈富算係分佈唔同行業外，其餘全部都係地產，公用同金融股
咁樣感覺唔太好，所以可能研究下唔同行業(都係果句，一揀就要揀壟斷股)

而今日係開始買股票2周年
哈哈...有虧損...
而且收息目標唔達標(每年增加被動收入HKD12000, i.e.每月多HKD1000)
算啦，今年都知道自己有乜問題，繼續努力！

美股：

瘋狂式大起大落，而D股票有少少虧損。
而我都深信美股仲可以跌，所以都保有足夠現金
跟返原有策略，月供美股ETF同時一遇到大跌就入多D
(P.S.上次set USD200 入VOO，點知佢200.57係最低位，之後一去無回頭...)