6/2021 股票成績

 

港股:

今個月都好似跌得好勁，尤其係粵海投資(0270)同冠君(2778)，但overall黎睇其實都唔係太差，跌左2%。

對粵海投資(0270)同冠君(2778)既態度不變，可能會加碼，因為2個股息率都有5.X%，買佢地可以增加現金流。就算幾多人都話港股唔值得投資，但我只相信數據。有一位前輩講過，好多上市公司每年吹噓自己有幾勁，增長有幾多，唯獨係現金流，尤其實際派息唔可以或者好難長期造假，所以長期可以穩定派息既公司先係皇道。

美股:

除左BRK.B之外，其他都升得唔錯。

今個月都加碼買左ETD既BAMI同BEPH各10股。其實ETD佔我成個美股組合都好少，只有3.X%，因為ETD選擇真係好少，而且今年先開始學買債劵，唔敢亂黎。希望學耐多少少同埋儲多少少錢就買入場價USD10000既債劵啦，多好多選擇。

財務自由進度：1.37M / 10M

註1: 阿囡9月開始讀幼稚園N班，要留定半年現金交學費。

註2: 1年過去，總資產增加HKD367027，平均每月月入HKD30585(比家庭每月儲蓄多幾千蚊，即係投資有效果

題外話：

中坑密謀做個youtube channel去分享個人FIRE運動之路，內容除左投資之外，仲有儲蓄，慳錢，製造多重收入等主題，詳情有待公佈。

5/2021 股票成績

港股

美股

兩個市場都無乜特別。

港股就由佢現金流成長，美股就keep住月供。

財務自由進度：1.34M / 10M 

(個進度跌左，除左要交10700做保險之外，仲有一筆洗費係令到我好唔開心既，有機會+有心情先講。)

4/2021 股票成績

 

港股：

同恆指一樣，無乜太大變化。

粵海投資(0270)雖然大跌，但係佢頭3個月既業績做得幾好，收入按年增加85.7%，純利增長39.1%。加上佢個護城河真係好深(水資源+物業發展)，所以繼續放心持有。

美股：

有D增長，唔錯唔錯。

我既美股3巨頭(BRK.B，QQQ，VOO)都有超過4%單月升幅。其他都好悶，不過我中意，正所謂悶聲發大財，我又有更多時間去發掘更多額外收入。

中坑考慮緊將VYM，VYMI同SCHD套現，擺入VNQ同VNQI。因為外國著名FIRE Blogger FINANCIAL SAMURAI 有一篇文章講過，如果你仲有穩定收入，就不如將多D錢擺入增長股而唔係擺入收息股。因為後生時你仲可以承受到股市波幅，唔需要靠你既被動收入過日子。而且美股會扣30%股息稅，換言之依30%唔可以幫我錢滾錢，好唔著數。

港股都一樣，始終我成個港股組合都係收息股。就算每年有6-7%増長都唔夠快令我達到財務自由。等我諗到方案後再同大家講。

財務自由進度：1.36M / 10M 

有用連結: 

Better To Invest In Growth Stocks Over Dividend Stocks For Younger Investors

https://www.financialsamurai.com/better-to-invest-in-growth-stocks-over-dividend-stocks-for-younger-investors/

3/2021 股票成績

 

港股：

依個月恆指跌左2.13%，而我既組合跌左3.3%

主要問題係越秀交通基建(1052)派好低息，股價1日跌左10%，我都因為佢業績差，低派息而清佢倉，只係賺好低既差價。

而粵海投資(0270)公佈業績後，一星期都跌左10%。業績報告話佢盈利跌左10%，主要資本性開支有所提高，但佢總資產提高唔少同佢派息都keep住有增長，我依然先持有，再研究一下會唔會增持啦(應該都唔會住)。

有意再買多一隻股票收息，去填補越秀交通基建(1052)無左的派息。暫時只有置富產業信託(778)納入考慮之選，搵多D時間睇下仲有無其他股吧。

又到港股年結，3年6.45%，每年1.87%增長...真係差...

希望今年港股真係過左熊市好D啦~

美股：

上個月QQQ跌左10%，所以用返之前既策略，跌10%就額外供多D，再跌再加碼。但跌完就升返幾%，唯有再等。

另外，台灣youtuber清流君比較定期定額同一次性投入，結果竟然係一次性投入會比較著數。顛覆左我之前既諗法。可能要對我既月供方法再從長計議。

財務自由進度：1.32M / 10M (今個月唔係太好，只有唔夠1萬既增長😐)

2/2021 股票成績

 

港股：

中坑成堆舊經濟股發威，成個組合一個月內升左7%。雖然不及增長股升勢咁勁，但以收息股黎講，依個升幅絕對接受。

新地(0016)升得好勁，但都未去到唔合理水平，可能再渣多陣。

我覺得冠君(2778)，長建(1038)同中電(0002)都未去到合理水平，再等等。

中電(0002)，新地(0016)，冠君(2778)出左業績但未有時間睇，希望抽到時間睇下。

美股：

岩岩又係年結：每年7.92%增長

雖然上年美股大升，因為係第1年玩美股，所以基本上都係月供股票同埋買左唔少債，所以分薄左唔少增長。但為左平衡風險，都要照做。

今個月美股急跌，趁機再買兩隻ETD: WRB.PR.G同SOJE收下息。

財務自由進度：1.31M / 10M

1/2021 股票成績

港股：

今個月恆指升左唔少，但中坑今個月初已經放左所有盈富去換馬，雖然換馬D股票都升左唔少，但都唔夠盈富升得高。渣住既港股都係舊經濟股，食唔到太多既升浪，但今個月最後一個星期恆指跌左6%，我個港股組合都無跌得咁傷。

今個月粵海(0270)無啦啦跌左10%，去到13蚊水平，佢岩岩又同香港續約，所以我唔信佢有咩問題，就係13.22蚊入多1手(已經係組合第2大，所以應該唔會再入)。

越秀交通基建(1052)都跌左近10%，但暫時就唔會咁入貨，因為佢上次中期無派息，小心D好。

組合依3年都係得2%增長，好渣，雖然可以賴社會運動賴疫症，但賴黎都無用，要自己好好加油，爭取好D既回報。

(註：我既港股組合都係作收息用，係因為自己預期恆指既升幅會比以前減慢)

美股：

今個月決定加大股票月供額，至每個月既儲蓄額既50%，就係因為一句說話：Time in the market, but not to time the market。唔識估個市幾時跌，就由D錢擺入股市，比佢長年增長吧。

但今個月尾S&P500跌近4%，不過唔怕，其實我寧願再跌得勁D，我仲有好多現金可以慢慢入貨。

今個月開始會用bonus月供買入SCHD，VYMI，VNQ，VNQI，去建立收息及房地產組合。

財務自由進度：1.24M / 10M (同上個月無分別，因為今個月又交稅又交保險，已經用晒今個月既儲蓄 -_-!)

12/2020 股票成績

 

港股：

今個月放晒盈富基金(2800)，將部分現金流向美股，部分買左領展(0823)同越秀交通基建(1052)。

領展(0823)，粵海投資(0270)同越秀交通基建(1052)今個月都好叻仔，兩隻一個月內都升左10%，對收息股黎講都唔錯啦！

最大持股中電(0002)同新地(0016)都表現麻麻，但我相信佢地係被低股價格，咁唯有再等多陣。

(其實我都好想入手中電，但再入就令成個組合太偏向中電。)

美股：

襯年尾執一執個portfolio，將3大持股BRK.B，VOO，同QQQ執返同一比例。

然後將stock比例拉近至25%，VCIT會繼續加大個比例。

話就話有11%股票增長，但股票比例太少~

財務自由進度：12.4%

2020回顧及展望

港股

依一年對香港前景感到好迷惘，唔會覺得港股以後有太大增長，所以唔會再將額外資金擺入去，任由之前已經擺入港股既資金滾存。而且會逐步將資金移向收息股，令港股變成一個收息組合，因為香港唔收股息稅，比起美股要收30%股息稅黎講，現金流會高好多。希望依個決定可以為將來提供一個好穩定的現金流。

現時組合太偏向地產股及公用股，風險較大，所以想將一部分資金移向其他行業。今年年尾考慮左好多唔同行業，有電訊，公路，物流等，最後都係揀左公路股，因為公路股係結構性壟斷既行業 (個人唔中意品牌壟斷既行業，就算依家做得幾壟斷都好，終有一日如果服務做得唔好，或者有新技術代替既話，護城河好易就被摧毀)，希望可以揀多一兩個行業去投資。

公路股上我會先揀越秀交通基建 (1052)，第一佢分佈比較分散，第二佢往年有穩定股息增長。但佢今年中期唔派息，有D卻步，所以唔會入得太多住，等佢全年業績恢復派息會再入返多D。

仲有中坑想慢慢將盈富所佔組合減至10%，什至更低。因為股息率比起收息股實在太低 (最多~3.5%)，我又唔覺得會有高增長，所以會揀個時間減持。

港股今年組合增長：0% (唉...)

港股每年期望增長：5-10% (主要係股息)

美股

上年研究左好耐，今年先第一次玩美股。

基於我既英文真係好屎，而且對美國唔熟悉 (連美國都無去過)，所以暫時只會入ETF。而且我會參考Benjamin Graham既建議，會以市場既平貴程度進行資產配置：

市場亢奮 - 股票25%，債劵75%

市場合理 - 股票50%，債劵50%

市場悲觀 - 股票75%，債劵25%

ETF方面，我揀左QQQ (科技增長)，VOO (整個美國市場)，BRK.B (其實佢唔係ETF，但係佢包含全球優質股票，所以我揀左佢)作股票組合，比例為1:1:1。而債劵ETF本身我係揀BND(國債+企業債)，後來我揀左VCIT(中期企業債)，因為佢入面最低評級既債券都係BAA (已經好高)，而且中期債劵對利率不太敏感，帶來穩定增長之餘又可以避險。

我認為現時市場太過亢奮，我會先逐步將VCIT佔比加大至50%，同時保留一定現金，如果市場大跌會進一步投入股市。

如果有一D額外收入 (例如雙糧，bonus)，同老婆商量後，會入返D收息股，暫時我會揀VYM，VYMI，VNQ (本身想揀埋VNQI，但今年唔知點解無派息)

暫時依個策略好適合我，依個組合唔需要我太多時間去睇年報同分析個股，比我多D時間去湊小朋友同有空間去搵機會增加額外收入 (小生意，買baby bond等，一陣再講)。

美股今年組合增長：18% (主要因為3月大跌果時入左唔少)

美股每年期望增長：10-15% 

學習

今年睇左幾本書，最深刻都係下面依幾本書 (依度唔寫書評啦，之前寫過)。

漫步華爾街 (ETF神書)

富爸爸投資指南（上，下）(教我對資產既定義同推使我做一下小生意)

FIRE 財務自由 (推使我做小生意，做副職同如何省錢)

現金流為王1, 2 / 懶系投資法 (教我如何買債券同槓桿)

來年計劃

1. 學習如何買債劵。先學習買ETD開始。

2. 做下小生意 。主要係做賣野，希望做到另一種被動收入來源。

    A. 我有少少3D打印技術既知識，所以想賣用3D打印做既精品，有興趣可以睇下以下連結：

          https://www.instagram.com/fayshomeware/

    B. 我都好中意唔同NBA球星，所以都賣下掛畫

最終目標

每年寫一次去激勵自己。

退休目標年齡：40歲 (仲有6年時間)

退休預計年齡：43歲 (仲有9年時間) (註：用financial freedom calculator計算)

退休儲蓄目標：12% (漫漫長路...)

        

11/2020 股票成績

 

港股：

本身上個月跌到懷疑人生，點知今個月升返差唔多10%，月中仲有一段時間係正數。

所有股都升返唔少，唯獨長建(1038)只係升得少少，越揸越無信心。

暫時照計依個收息組合run得幾順，唯獨真係想減持盈富基金(2800)，依隻又唔係穩定向上，股息又唔夠人多，加上入面好多藍籌得個大字，無發展空間，希望有機會放走佢，買入多D收息股什至轉去美股。

美股：

今個月美股有個新突破：1. 買入VCIT去增加企債係債劵上的比例；2. 買入ETD>>>TBB

另外會睇返股票，現金，債劵(ETF+ETD)比例進行資產分配，暫時比例係想25:50:25。所以想供多D債劵。

另外之前話想VOO:QQQ:BRK.B比例係1:1:1，所以每個月將會供多股QQQ。

10/2020 股票成績

港股

今個月港股繼續浮浮沉沉，好唔掂。

入左一手粵海投資(0270)@11.9，點知一個禮拜可以跌到11.02，好彩第三期業績唔係太差，升返少少。仲諗緊如果再跌既話，會否再入。

持有的兩個Reits今個月做得好差，尤其冠君(2778)，一個下午可以跌5%。冠君仲係風眼股(疫情+政治運動)，會持有，但唔會增持。如果未來確定無乜自由行黎既話，中坑會考慮減持。

領展(0823)今個月都跌唔少，但我可能會再增持少少，話晒係必賺行業。

中電(0002)出左第三期業績。維持派息，唔錯，可能又會增持。

短期內可能放埋果少少港交所(0388)碎股，以便日後有資金月供越秀交通(1052)，令港股組合變成純收息股組合。

美股

投資組合大跌。(+20%>>11.57%)

但唔緊要，其實股票同現金佔比20:80，絕對仲有足夠現金去增持。

會以S&P500做reference，PE跌到合理價時會增持，並會加大月供金額。

後記：

港股組合方面，簡直跌到懷疑人生。

其實跌左既金額都係個幾月既人工，未蝕到入肉。但係依2年既機會成本就浪費晒。心入面都覺得香港已死，但會唔會轉晒美股呢?我又唔太想，所以先將港股轉晒收息股，但咁其實係咪岩呢?

一邊又買美股作資產增值，一邊又將港股作現金流配置，最後會否去到兩頭唔到岸既地步呢?經過今年之後，我覺得應該認真思考一下。

中坑大約於依個時間開始投資

9/2020 股票成績

 港股：

港股今個月都跌得幾勁

恆指跌左1200點，大約5%

自己個港股收息組合都跌4.5%

主要係長建（1038）同粵海投資（0270）領跌😭

真心唔明長建做乜跌得咁勁，無增長都可以穩定派息啫

另一方面，今個月入左越秀交通基建（1052），8.5%股息，加上穩定需求，希望為中坑既港股組合帶來穩定現金流。如果全年業績恢復派息，應該會再入多1-2手，現金少許現金作月供就算。

美股：

跌左少少，無乜好講，繼續月供。

不過可能加大月供金額：

加多股brk.b或者加多股bnd(或者why not both)

因為現時股票現金組合係20:80，我希望升至大約25:75，再考慮清楚先。

2020-08 股票成績

 

港股：

成個組合好似升返唔少，希望疫情過左就再好D。依家買果D股都好民生，政治運動都應該唔會對佢太大影響。

只係粵海投資(0270)唔太生性，不過還可以，如何再跌到超過5%股息率就再入一手。

之後依一兩個月中電(0002)，粵海投資(0270)，長建(1038)，冠君(2778)都會派息，正！！

美股：

升到我都有少少怕。

但都會keep住原有策略，繼續月供。

因為中坑認為美股現在比較高估，所以會以每個月既25%收入進行月供。

今個月入左VOO，QQQ同第一次入既BND作風險管理。