2022年12月9日星期五

無斬倉風險既簡單槓桿方法:買入槓桿ETF (LETF)

平時睇D投資書好多都會提及槓桿,槓桿係一個兩刃劍,可以加倍你既獲利同時可以加倍你既虧損。中坑本身都好怕槓桿依樣野,從小比老豆灌輸唔好借錢,唔好借錢,唔好借錢(重要既野講3次),成日都好怕輸左要賠錢,而且細個成日睇電視都話炒孖展輸左要跳樓,所以中坑都對槓桿依樣野避之則吉,直到今年先開始敢買債劵CEF,開始試下用比較安全既方法擴大債券方面既回報。

參考文章:嘗試從債劵部分改善美股組合

但除左買債劵CEF之外,仲有咩方法可以無斬倉風險下槓桿我既回報呢?首先我既原則係可以輸晒,但唔可以賠錢,而槓桿ETF (LETF)就係一個好選擇。槓桿ETF係咩就唔多講,最耳熟能詳既一個LETF就係TQQQ,大家有興趣就上網search下有關LETF既資料。

咁我去研究下點樣投資LETF先最適合,研究過程中係連登見到一篇好好既文章:

https://lihkg.com/thread/3232194/page/1 (基於尊重版權,只貼討論區內的內容)

入面我最中意依段:

用現金買指數,屬於「用安全嘅方法玩安全嘅嘢」。
用現金買妖股,屬於「用安全嘅方法玩危險嘅嘢」。
用槓桿買指數,屬於「用危險嘅方法玩安全嘅嘢」。

投資指數比起投資個股絕對係一個比較安全既投資方法。因為指數都會隨住入面每一隻個股既市值而調整比重,分散風險。

(相反,如果想加速回報,就要承擔集中投資既風險)

(我知投資指數唔一定係最安全既方法,恆指就係一個好例子,但買美股既指數都已經算係好安全。如果要再分散風險既話就應該買多幾個國家既指數,什至全球指數。依個方面我都仲思考緊,諗到再講。)

如果投資指數係一個好安全既方法,咁買LETF就係用高風險既方式去買低風險既投資,得出既結果會係咩?


用最受歡迎既QQQ同TQQQ做例子:
根據上圖,最直觀既睇法係長期計既話TQQQ真係可以升到飛天,但係遇到大跌市都可以打回原型。

LETF比起其他槓桿工具既優點:
1. 無斬倉風險 (依個係最吸引中坑既地方)
2. 大部分最多只可以 3X 槓桿
3. 一個最簡單既槓桿方法,複利效應係每日計,所以可以升到好癲

當然LETF都有佢既弱點:
1. 當股市大跌時,LETF會跌得仲甘,股市返家鄉時LETF都未返到家鄉。舉個例子,當年2000年科網股股災大跌再加2008年金融海潚,如果你當時持有TQQQ既話最大就會有99.9%既損失,到依家都遠遠未返到家鄉。


2. 當遇上波動市時,LETF係會慢慢decay下去。

基本上依兩個情況成日發生,尤其遇到第一點真係可以輸清光,所以想用危險嘅方法玩安全嘅嘢就要部分持有LETF同時定期做資產配置。同埋LETF真係波動得好勁,可以一日10幾%上落,要頂得住過山車般既波幅先好持有。

中坑都想加速自己增加資產,所以開始買入TQQQ同SPXL依兩隻流動性較高既LETF,但係未決定好佔成個組合既比重有幾多,決定好再講。

後記:
經清流君youtube既介紹下,我睇左下面依本<<諾貝爾經濟學獎得主的獲利公式>> (其實我覺得英文直譯生命週期投資法好聽D)。



但其實越睇越R頭唔明佢講咩,只係有幾個說法比較深刻:
1. 槓桿投資即係你借未來既錢去提早投資,盡早用複式效應去滾存更多資產,然後退休前慢慢去槓桿。
2. 最多只做兩倍槓桿。
3. 佢唔支持用LETF做槓桿,原因上面講左。

希望第日修為好D再睇多次依本書明佢up乜,或者到時已經財務自由唔洗考慮槓桿(希望啦😂)

8 則留言:

  1. 睇唔明都無問題,睇其他博友分亨真賞體驗,還來得透切一點,好奇想問師兄的Logo 失禁的人物,係咪有甚麼寓意。草上飛

    回覆刪除
  2. 我今年試咗 7200 同 7226,點知奶哂嘢,結論係我唔會再買有槓桿嘅 ETF。美股可能好啲,但只是2-3倍槓桿,其實唔藉得有輸哂的風險。因為始終跌市就急,升市就慢,另到呢種ETF,升就升唔足,跌就會比正常ETF跌突,係波動市和跌市好難操作。

    又係個句,這幾年傳媒不斷吹捧這些ETF,其實係冇好嘢。

    回覆刪除
    回覆
    1. 升市果陣我反而無乜留意LETF,但跌得勁果陣我就對LETF有興趣。而輸晒既機會率係的確有,不過真係少,如果相信NASDAQ同S&P500長遠會一路升,買入一定數量既LETF再平衡資產都係一個選擇。

      明白無忌兄既苦口婆心,我都有考慮過,傳媒不斷吹捧既我都會多加警惕,多謝提醒。

      刪除
  3. 呢1,兩年,都積極想轉向7200呢類ETF,都未能轉刑成功,今年仲因大跌市,被7200拖累輸鑊金.
    研究過7200算跟到恆指上落,損耗唔多,7500就跟唔到恆指,損耗很大.
    現時都仲會買7200,但只會佔組合一部份,始終波幅太大,心理壓力唔少.
    買呢類ETF,覺得都要了解指數走勢既方向先可以,並唔係長揸不放既選擇

    回覆刪除
    回覆
    1. 不知道是否因為7500是反向,全靠衍生產品,較大decay
      X3 ETF基本上係股票實物,只加槓桿(息),比較透明

      刪除
  4. 呢本書我都有睇到,對我黎講都好有啟發性,我見解係作者主張係分散投資上面再加上一個維度 "時間", 而股債比例應該係用一世人的角度去定,然後backward 咁分散返係整個人生的時間入面。 所以作者話後生時股票要多個100%。 我都睇過清流君條片, 睇完反而幫唔到理解😄。 BTW, 多謝分享。

    回覆刪除