4/2021 股票成績

 

港股：

同恆指一樣，無乜太大變化。

粵海投資(0270)雖然大跌，但係佢頭3個月既業績做得幾好，收入按年增加85.7%，純利增長39.1%。加上佢個護城河真係好深(水資源+物業發展)，所以繼續放心持有。

美股：

有D增長，唔錯唔錯。

我既美股3巨頭(BRK.B，QQQ，VOO)都有超過4%單月升幅。其他都好悶，不過我中意，正所謂悶聲發大財，我又有更多時間去發掘更多額外收入。

中坑考慮緊將VYM，VYMI同SCHD套現，擺入VNQ同VNQI。因為外國著名FIRE Blogger FINANCIAL SAMURAI 有一篇文章講過，如果你仲有穩定收入，就不如將多D錢擺入增長股而唔係擺入收息股。因為後生時你仲可以承受到股市波幅，唔需要靠你既被動收入過日子。而且美股會扣30%股息稅，換言之依30%唔可以幫我錢滾錢，好唔著數。

港股都一樣，始終我成個港股組合都係收息股。就算每年有6-7%増長都唔夠快令我達到財務自由。等我諗到方案後再同大家講。

財務自由進度：1.36M / 10M 

有用連結: 

Better To Invest In Growth Stocks Over Dividend Stocks For Younger Investors

https://www.financialsamurai.com/better-to-invest-in-growth-stocks-over-dividend-stocks-for-younger-investors/

不創不創還需創(業)

 今日講下股票以外既野，想講兩樣野：

1. 上星期睇完物理治療，阿sir話可以打返波同做返foodpanda步兵。而之前睇左一本書「超速學習」，其中一個做法係重覆練習自己既弱點，中坑打波弱點係右手上籃（中坑係左撇子）同射三分，我就集中苦練依兩樣。一開始一定係好痛苦，好似handicap咁手腳唔協調，但我相信只要克服自己弱點，一定可以有大躍進。「超速學習」讀後感會係另一篇文章再講。

2. 隻腳好返就做返Foodpanda步兵，兩晚做左6個鐘，賺$450。每次做完對腳都好攰，而咁攰既我開始get到一d野：我堅持做步兵既原因係比自己覺得真係努力去賺外快而唔去創業既藉口：「我好努力去賺錢架啦，創業依d野之後再搞啦。」咁樣下去唔掂，我已經3個月無認真處理創業既問題，要cheer up返。

3. 點解我好想創業呢？要創造被動收入主要有兩招。第一係你買入資產，即係股票/債劵/房地產。依樣不嬲有做開，但我既人工基本上都定好左，而我買etf都唔會預佢爆升，所以只靠買資產既話，無得再加快財務自由既進度。而第二係創造資產，即係唔洗用錢或者用好少錢去建立一個生財工具，例如上網賣野。但創造資產既共同點就係要多人識你，網上賣野、YouTuber、聯盟營銷，通通都係要出名先得，而依樣係我創業上既一大障礙，亦都係成日對創業卻步既原因。而中坑今年目標有2個，一個係識選債買債，一個係創業，前者順利進行中(已買入5隻ETD)，創業仲係未有太大方向住，但做完步兵後既辛苦成為我創業既動力，加油！

09-04-2021 買入粵海投資(0270)

於09-04-2021買入粵海投資(0270)，繼續成為港股組合第二大持股，帳面上仍然係有5%虧損。雖然佢今年用左好多錢，但佢既資產上仍然有一定既升幅，而且派息增加，所以增持。

到今日(16/4/2021)，粵海投資公佈左正面盈利預告：董事會謹此知會本公司股東及潛在投資者，預期截至 2021 年 3 月 31 日止三 個月的歸屬於本公司所有者的未經審核綜合溢利較截至 2020 年 3 月 31 日止 三個月增加不少於 35%。

表面上係一件好事，但需唔需要特登攞出黎講呢?係因為上次出左全年業績股價大跌後，穩定返各位股東既信心??

Link: http://iis.aastocks.com/20210416/9721855-0.PDF

契媽（Ark)，Bitcoin，Tesla之我見

之前同朋友討論依幾樣值唔值得投資，所以中坑就上網睇下有無懶人包，之後睇到YouTube老高同清流君都有講，都幾詳細。

Bitcoin
有一個不明人士自創左一個加密貨幣既技術並擺上網，其他專家見到堪稱完美，就copy一個出黎，成為左Bitcoin

問題黎啦：
1. 人地做到一套Bitcoin，都可以copy多幾套Bitcoin出黎，咁Bitcoin既護城河係咪會好易被打破？
2. 邊個監管Bitcoin? 好似官方無監管。即係生產Bitcoin班人彈一彈指就令佢毫無價值。

契媽（Ark）
其實我buy佢理念，買一d有機會顛覆世界理念既公司。

但問題又黎啦：
係咪牛市股神？Arkk 2014年開始有穩定增長，係2020年開始突然爆炸性增長先開始多人留意，但面臨熊市時會唔會祼泳呢？依樣野真係要時間證明，咁我依家暫時買QQQ好過。

Tesla
我好佩服Elon Musk，睇完佢本書，再睇埋老高介紹佢既兩段片，知道根本佢係超級天才。唔止，佢係一個執行力勁高既領導者，佢日常既職務唔止係管理生意，仲擺大量時間同一班工程師一齊設計。

但我從佢既傳記睇得出，佢係一個時間管理比較差既人，對預估開發時間經常滯後。作為一個普通人，我係非常佩服佢，但如果作為一個股東，佢究竟可唔可以為我爭取到最大盈利呢？

帶頭盔：我只對依3樣野作出好膚淺既理解，可能對其他blog友既想法會有好大出入。

3/2021 股票成績

 

港股：

依個月恆指跌左2.13%，而我既組合跌左3.3%

主要問題係越秀交通基建(1052)派好低息，股價1日跌左10%，我都因為佢業績差，低派息而清佢倉，只係賺好低既差價。

而粵海投資(0270)公佈業績後，一星期都跌左10%。業績報告話佢盈利跌左10%，主要資本性開支有所提高，但佢總資產提高唔少同佢派息都keep住有增長，我依然先持有，再研究一下會唔會增持啦(應該都唔會住)。

有意再買多一隻股票收息，去填補越秀交通基建(1052)無左的派息。暫時只有置富產業信託(778)納入考慮之選，搵多D時間睇下仲有無其他股吧。

又到港股年結，3年6.45%，每年1.87%增長...真係差...

希望今年港股真係過左熊市好D啦~

美股：

上個月QQQ跌左10%，所以用返之前既策略，跌10%就額外供多D，再跌再加碼。但跌完就升返幾%，唯有再等。

另外，台灣youtuber清流君比較定期定額同一次性投入，結果竟然係一次性投入會比較著數。顛覆左我之前既諗法。可能要對我既月供方法再從長計議。

財務自由進度：1.32M / 10M (今個月唔係太好，只有唔夠1萬既增長😐)

多重收入的重要性 2

之前有講過中坑有做Foodpanda黎增加自己既收入，但係我依排整親右膝，上落樓梯都痛。差唔多成個月都未好返，無得打波之餘又唔可以做Foodpanda，每個月都無左2000蚊。😓

好彩Foodpanda唔係正職，而係兼職。如果我做Foodpanda或其他體力勞動作為正職既話，依家都幾頭痕。

近排忙住湊女又無得做運動，搞到無咩心情去開發副職，連睇下書都無心情，希望之後積極D啦~~~

針灸都無用

多重收入的重要性1:

https://oldmanlearninvest.blogspot.com/2021/01/blog-post.html

清倉越秀交通基建（1052）

前一日公佈業績，全年純利跌85%，派息7港仙。

報告話因肺炎期間要免費通行，所以跌咁多。但係大佬呀，你淨係得3個月免費，無左1/4啫，點解可以跌左85%呀？

好，我再望下年報，睇到物業公允值都係跌少少啫，都唔會咁差呀？

再望下年報，上年年尾又話買左個公路，我當你用左d錢買資產作增值，但係咁樣而犧牲左股東既股息（比上年比較少左66%股息），sorry中坑都係接受唔到。🖕🏻

所以今日清晒所有越秀交通基建，淨係計股價都有賺少少。

算啦，揸返少少現金，等跌再買其他股。

唉，揀公路股上有陰影🥲