2023回顧及展望

 可以先睇下中坑歷年回顧，睇下我依幾年有無咩進步

2022回顧及展望

2021回顧及展望

2020回顧及展望

港股

中坑港股持倉

港股overall growth -10.09%，上年係-6.45%，即係話今年跌左3.64%

而恆指今年跌16.7%，已經連續跌4年，雖然贏左恆指，但唔見得光彩...

今年開始用收到既股息買入香港電訊(6823)，應該比到我更穩定既現金流。

放左一部分冠君(2778)去幫領展(0823)供股，冠君(2778)真係好廢，以前貪佢有成個朗豪坊同花園街3號，疫情完左業績都無乜改善。從錯誤學習啦，買要買多資產既REITS，要搵機會放走佢。

如無意外港股每年比到我3萬蚊現金流，同上年一樣，唔會再注入新資金入港股，只用現存既倉位同股息買入收息股，選股條件係長期穩定派息同派息長期會有增長。

港股真係無咩好講...年年都咁跌，今次真係...

港股今年組合增長：-3.64% 

港股每年期望增長：5-10% (又又又不達標)

美股

美股組合

直債/ETD組合

話就話S&P500同NASDAQ今年都升左好多，但其實上年跌得甘既關係，其實兩個指數都只係接近歷史高位，所以我9估今年仲有機會升多浸。

今年美股做左D新既嘗試，睇落都唔錯：

1. 大量買入TQQQ同SPXL。7月開始無再買入VOO同QQQ，只買TQQQ同SPXL，目標係直到balance到個槓桿比率為2倍內。因為睇個好多數據都係話最好既槓桿比率為2倍，咁樣買雖然都幾大波動，可能股市太抗奮果陣會減低個比率。

2. 開始的起心肝喺IB開戶，然後買直債。Sofar依家都係買長期國債同短期公司債，用長期國債做一個好安全既現金流(國債5%呀大佬)，買定短期公司債可以收下息之餘，如果股市有咩波動都可以調返D資金去股票度。

因為依家我個組合含有槓桿ETF，所以我股債比會調整至6:4，以降低返波動同風險。

希望個資產配置大約係：

VOO 10-15%

QQQ 10-15%

BRK.B 0-10%

SPXL 15%

TQQQ 15%

債CEF (PTY+PFL+NMZ) 20%

直債/ETD 20%

點解想減持BRK.B比例呢?其實始終BRK.B係靠人去投資。巴菲特同芒格可以50年跑嬴大市呀，但50年後呢?擔唔擔保新一代掌舵人可以做到2位老人家咁犀利既成績呢?再者，其實過去15年BRK.B同VOO都係旗鼓相當(445% VS 485%)，所以可能巴郡神話再無過去咁犀利。

去年目標

今年真係一個懶人之年。書又睇少左，人又懶左。基本上上年既目標完成得好少，可惡！

上年目標：

1. Python，起碼學到基本野先 (學左唔夠一半基本野都唔夠)

2. 電子學上既知識，工作上用到，本身都有興趣 (有接觸下Linux，ROS同ESP32，ROS完全搞唔掂，ESP32玩到想整IOT，但工作太忙玩唔到)

3. 木工，之前幫屋企整書枱從而發掘到依個興趣 (幫阿女整完張床就無再掂過)

學習

今年做左一D改善身體既習慣，分別係沖凍水涼，168節食同冥想。懶得打佢地對身體既好處，我直接貼link啦。

沖凍水涼

168節食

冥想

而且今年又投入步兵行列，之前死都唔肯做返，但之後買左滑板車，送貨速度同舒適度其實都高左好多。送快左又賺多左。不過始終唔可以長做，因為用體力賺錢既收入係最低，最容易被取代既收入來源。

來年計劃

小弟真係對電子同編程有興趣，所以今年既目標基本上同上年一樣：

1. Python，上晒成個基礎課程先

2. 電子學上既知識，想玩ESP32，做到一個voice assistant既IOT

3. 想學期權並真係執行，只係做short黎掙現金流

最終目標

每年寫一次去激勵自己。

退休目標年齡：40歲 (仲有3年時間)

退休預計年齡：43歲 (仲有6年時間) (註：用financial freedom calculator計算)

財務自由進度：23.1%(上年16.1%)

《複利的喜悅》讀後感

 一如以往，只記錄啟發到中坑既重點：

1. 終身學習。要掌握不同學科的思維模型，例如數學，物理，心理學，工程，商業等。8成主修2成副修，然後將不同的思維方式融會貫通，形成自己的一個獨特的思維模型。我都身同感受，因為做工程嘅主要係解決問題，而投資係用已得到嘅數據去不斷做出投資決定，所以兩種嘅思維方式好唔同，二點樣去融會貫通，就係我之後要學習嘅方向。

2. 寫投資日記。做每一次嘅投資決定都要寫低點解會咁做，同埋寫當時嘅心情可以反映出當時投資決定嘅心理情況。例如股市亢奮嘅時候我係唔係跟住亢奮而加大投資金額，而股市低迷嘅時候我又敢唔敢繼續投資落去，日後可以俾我回顧返我當初做嘅決定係唔係正確而可以作出反省。喺依度寫blog有一個好處，係可以自己寫完之後會有其他人反饋同教導，可以俾我對自己嘅投資有唔同諗法。

3. 反過來說，總要反過來想。唔可以只係諗每次投資有咩好處，都要諗每次投資嘅壞處。例如今次投資嘅機會成本係咩，同埋最差嘅情況會係點，成功嘅機會率大唔大。

4. 富人大部份都唔止一個收入。我依家只係有股息同埋債息嘅被動收入，而且個比例都唔高，主要都係靠自己嘅工作收入去維持生計，我都要諗吓辦法點樣再加多一份被動收入。

5. 寫一份投資檢查清單。平時都係只係去不斷思考去決定應唔應該做每一項嘅投資，而冇一個系統性嘅投資決定。做一份投資檢查清單，可以幫我數字化決定應唔應該做每一項嘅投資。而且可以幫我消除一啲偏好性既投資決定。

讀後感：其實呢一本書同窮查理的基本常識嘅內容都有好多重疊，當然啦窮查理的基本常識嘅內容係深好多。但我覺得依一本書嘅內容太過冗長，而且有啲位我都唔係好明，我都只係揀一啲自己鍾意嘅topic去睇。

差唔多消失左半年了，中坑係咪死左?

依篇唔係點講理財同FIRE，無興趣者可skip

因為有D原因(借口)，差唔多有半年無係依度update，我都覺得唔可以再係咁，所以再執筆寫下自己野。依半年發生好多事，而我又有D project想搞...

1. 病左好幾次，每次手尾都長。年頭阿女突然發燒，跟住惹埋我同老婆。病得最甘果個係我，又唔係中肺炎(每日都驗幾次都單線)，之後一兩個星期仲氣管敏感，有時半夜都咳醒...差唔多個幾月先好返。之後3月又黎生風癩加濕疹，直頭生晒成身都係，又係半夜會痕醒，睇完皮膚專科，驗埋血之後先知其中一個致敏原係塵滿，搞到依家都未斷尾，仲食緊藥...

2. 阿女都大個左，加上老婆投訴阿女夜晚訓覺成日踢佢，所以想將間雜物房轉做兒童房。本來想叫design house去整就算，不過原來好鬼貴，閒閒地都3,4皮，淘寶有D套裝床都有平啲既，不過運費又貴又無乜安全保證，所以中意DIY既我就決定幫阿女整間房出黎。

首先係電腦畫個草圖先，大部分傢俬材料都係用ikea，我上左大陸ikea網頁睇過，好多都平過香港好多，所以我就有部分傢俬拜託國內朋友買完幫手寄落黎。然後有啲濕濕碎碎就買返淘寶野，有啲都幾高質。

阿女唔中意木色，所以我就買左白色同粉紅色既木器漆逐條逐條木方油，乾晒先再砌。由於間房都好細，所以要砌好一小部份運入去再一次過砌好個床架。由於唔要下面個床架去比佢做個遊戲空間，所以剩低好多木條用黎做鞏固同欄杆。

最後千辛萬苦終於做好

淘左個lego牆比佢，佢似乎幾中意

之後仲有啲手尾要執，如果大家想知先繼續講。

3. 由於工作+興趣關係，我學緊寫python，係幾好玩既。如果大家都有興趣可以睇下面個youtube，都教得幾好。

4. 老婆轉工，唔慣轉工既佢返到屋企就好攰，咁加大左我湊女既工作，基本上阿女訓覺前都係我陪佢，等佢訓覺我都攰到攤左係度hea，一hea就hea成一兩個鐘，無乜時間增值自己，希望自己戒左依D壞習慣 (其實依家都catch up返睇書，有機會分享下。)

5. 成日話減肥減肥，今次真係的起心肝減肥。跟左個同事每個星期做2-3次gym，之後再去改變下飲食習慣，少澱粉質少糖，又實行168斷食法，so far效果幾好。2-3個月輕左5kg。

投資方面，港股就放左一部分冠君(2778)去幫領展(0823)供股，暫時睇落做既決定係岩既。而美股就同之前一樣咁樣月供，暫時結果唔錯，返回正回報。

多謝大家睇晒我堆廢話。🙌

2022回顧及展望

可以先睇下中坑歷年回顧，睇下我依幾年有無咩進步

2021回顧及展望

2020回顧及展望

港股

港股overall growth -6.45%，上年係2%，即係話今年跌左8.45%

比起恆指跌左15%既成績更好，其實組合好多股票都跌得低過恆指，但主要係一隻新鴻基地產(0016)救全家(+13%)同埋組合入面接近5%既股息先至可以頂一頂。

計埋今年，恆指都3年連跌了，最多由高位跌超過50%，究竟恆指幾時先跌完呢?無人知。幸好，我買既港股所有企業都係高現金流既公司股票，而且業務穩定，每年都派到息比我。今年都有兩萬幾股息袋袋平安，而我將今年股息再用黎再投資，得出黎既股息率會比之前更高。

年頭買左VTECH(0303)，但感覺唔係太壟斷，所以好快賣走左。

今年都無再買新股票，因為懶去研究其他行業，其實眼中有心水的，例如江蘇寧滬高速公路(0177)同中移動(0941)，兩個都係護城河深既企業，希望搵到時間研究啦~

同上年一樣，唔會再注入新資金入港股，只用現存既倉位同股息買入收息股，選股條件係長期穩定派息同派息長期會有增長。

港股今年組合增長：-8.45% 

港股每年期望增長：5-10% (不達標)

美股

今年係美股方面做左唔少改動去完善個組合：

1. 由債劵ETF轉左買直債同債劵CEF

睇完風兄的<<懶系投資法2>>對債劵ETF既睇法後，就放棄買入債劵ETF，轉左買直債同債劵CEF。

參考文章：嘗試從債劵部分改善美股組合

但因為唔清楚加息同債市既關係，年初買入唔少ETD(好多ETD都係長債)，而唔去接觸短債，搞到債果方面都幾損手爛腳。不過幸好，我買既所有ETD都係投資評級，理論上只要間公司唔執笠，我都可以唔理佢，一路收息，直到到期日。只係機會成本問題高左D啫，當買個可以彌補既教訓。

CEF就買左PTY同PFL，每個月派息就再投資，由佢自我膨脹，派息增多之餘又可以等減息再升。

2. 買入槓桿ETF

參考文章：無斬倉風險既簡單槓桿方法：買入槓桿ETF (LETF)

要等10年先可以財務自由既時間實在太長，如果可以受少少風險既話，咁就不如「用危險嘅方法玩安全嘅嘢」，即係買入槓桿ETF(LETF)。LETF可以輸到變0，但係無斬倉風險的話，我認為可以配置一部分資金入LETF做槓桿。

現時買入TQQQ同SOXL，暫時各佔組合1.X%左右，視乎情況加倉。

3. 少改動：清倉VNQI

我個倉有少量VNQI，本來打算買黎build up現金流，但依幾年派得又少又唔穩定，所以清倉。

學習

今年工作同湊小朋友方面都好累，都好少去學習一D新既野。尤其youtube，基本上都放棄左，其實有一段片錄左好耐但都係懶得去剪。

年中有研究過乜野係期權現金流，但好似都幾高風險同埋個本要夠大，所以就擱置左。

亦都有睇<<掌握市場周期>>，主要係用加減息同其他人情緒去判斷個市，都仲未掌握得好好。

唯一真係努力研究左出黎並且學以至用既野係CEF同埋LETF，可以投入組合入面。

去年計劃回顧

1. 學習槓桿買債 <<< 用CEF去做另類槓桿
2. 發掘優惠資源 <<< 有去搵下coupon之類，但唔係幾努力去搵。近期搵到由電話月費轉做儲值卡plan，實驗成功後share比大家知。

3. Catch up返拍youtube片 <<< 直接收左皮😓

來年計劃

除左繼續研究投資同額外收入外，想學返D自己有興趣既野多D：

1. Python，起碼學到基本野先

2. 電子學上既知識，工作上用到，本身都有興趣

3. 木工，之前幫屋企整書枱從而發掘到依個興趣

最終目標

每年寫一次去激勵自己。

退休目標年齡：40歲 (仲有4年時間)

退休預計年齡：43歲 (仲有7年時間) (註：用financial freedom calculator計算)

財務自由進度：16.1%(上年17.2%)

無斬倉風險既簡單槓桿方法：買入槓桿ETF (LETF)

平時睇D投資書好多都會提及槓桿，槓桿係一個兩刃劍，可以加倍你既獲利同時可以加倍你既虧損。中坑本身都好怕槓桿依樣野，從小比老豆灌輸唔好借錢，唔好借錢，唔好借錢(重要既野講3次)，成日都好怕輸左要賠錢，而且細個成日睇電視都話炒孖展輸左要跳樓，所以中坑都對槓桿依樣野避之則吉，直到今年先開始敢買債劵CEF，開始試下用比較安全既方法擴大債券方面既回報。

參考文章：嘗試從債劵部分改善美股組合

但除左買債劵CEF之外，仲有咩方法可以無斬倉風險下槓桿我既回報呢?首先我既原則係可以輸晒，但唔可以賠錢，而槓桿ETF (LETF)就係一個好選擇。槓桿ETF係咩就唔多講，最耳熟能詳既一個LETF就係TQQQ，大家有興趣就上網search下有關LETF既資料。

咁我去研究下點樣投資LETF先最適合，研究過程中係連登見到一篇好好既文章：

https://lihkg.com/thread/3232194/page/1 (基於尊重版權，只貼討論區內的內容)

入面我最中意依段：

用現金買指數，屬於「用安全嘅方法玩安全嘅嘢」。
用現金買妖股，屬於「用安全嘅方法玩危險嘅嘢」。

用槓桿買指數，屬於「用危險嘅方法玩安全嘅嘢」。

投資指數比起投資個股絕對係一個比較安全既投資方法。因為指數都會隨住入面每一隻個股既市值而調整比重，分散風險。

(相反，如果想加速回報，就要承擔集中投資既風險)

Source: <我用死薪水讓錢替我賺錢> 讀後感

(我知投資指數唔一定係最安全既方法，恆指就係一個好例子，但買美股既指數都已經算係好安全。如果要再分散風險既話就應該買多幾個國家既指數，什至全球指數。依個方面我都仲思考緊，諗到再講。)

如果投資指數係一個好安全既方法，咁買LETF就係用高風險既方式去買低風險既投資，得出既結果會係咩?

用最受歡迎既QQQ同TQQQ做例子：

根據上圖，最直觀既睇法係長期計既話TQQQ真係可以升到飛天，但係遇到大跌市都可以打回原型。

LETF比起其他槓桿工具既優點：

1. 無斬倉風險 (依個係最吸引中坑既地方)

2. 大部分最多只可以 3X 槓桿

3. 一個最簡單既槓桿方法，複利效應係每日計，所以可以升到好癲

當然LETF都有佢既弱點：

1. 當股市大跌時，LETF會跌得仲甘，股市返家鄉時LETF都未返到家鄉。舉個例子，當年2000年科網股股災大跌再加2008年金融海潚，如果你當時持有TQQQ既話最大就會有99.9%既損失，到依家都遠遠未返到家鄉。

2. 當遇上波動市時，LETF係會慢慢decay下去。

基本上依兩個情況成日發生，尤其遇到第一點真係可以輸清光，所以想用危險嘅方法玩安全嘅嘢就要部分持有LETF同時定期做資產配置。同埋LETF真係波動得好勁，可以一日10幾%上落，要頂得住過山車般既波幅先好持有。

中坑都想加速自己增加資產，所以開始買入TQQQ同SPXL依兩隻流動性較高既LETF，但係未決定好佔成個組合既比重有幾多，決定好再講。

後記：

經清流君youtube既介紹下，我睇左下面依本<<諾貝爾經濟學獎得主的獲利公式>> (其實我覺得英文直譯生命週期投資法好聽D)。

但其實越睇越R頭唔明佢講咩，只係有幾個說法比較深刻：

1. 槓桿投資即係你借未來既錢去提早投資，盡早用複式效應去滾存更多資產，然後退休前慢慢去槓桿。

2. 最多只做兩倍槓桿。

3. 佢唔支持用LETF做槓桿，原因上面講左。

希望第日修為好D再睇多次依本書明佢up乜，或者到時已經財務自由唔洗考慮槓桿(希望啦😂)

二選一：增長VS現金流?

今年美股港股大跌，中坑個總資產都跌唔少。初時我都決定用QQQ，VOO，BRK.B加少量bond去做資產增值，但趁依個機會可以反思返：應唔應該建立一個現金流既資產?

依個topic思考左好耐，我從唔同方面，包括自己身處既主觀因素去一步步思考：

客觀因素

• 以長期黎睇，增長股升得高過收息股；
• 增長股波動高過收息股，而且係熊市時收息股都有一定股息收入；
• 會唔會錯誤長線投資落一個唔得既市場呢? (恆指係一個好例子，幾年前個個都話唔識投資就投資2800，依家賤過地底泥)；
• 雖然睇過好多書話現金流投資成績可以好過投資增長股，但大前題係：1. 識槓桿 2. 識揀股 3. 識睇周期；
• 美股股息要收30%稅

主觀因素

• 我同老婆都有份正職，就算依家其中一個人唔返工都勉強可以支撐成頭家既支出，所以現金流暫時唔會有問題；
• 除左少量債劵同港股高息股外，我已經無任何被動收入 (其實真係應該要建立多幾種被動收入)；
• 我希望10年內退休

從依幾點考慮既話，我暫時都會繼續以指數投資作為我既策略，如果下一次牛市或者退休兩三年前就會開始投放多D現金流資產上。

9/2022 股票成績

今日寫月結果陣都真係有D沉重，因為真係跌得有D離譜。

美股今年由高位開始跌到依家，港股又一路跌到無盡頭咁，足足3年。

但係作為(自稱)長線投資者，唔估市，完全time in the market既時候，咁既大跌市絕對會遇上。

所以依家成日諗，係咪應該因應市場環境去調節自己倉位呢? 現金流VS資產增值? 等我詳細考慮多一陣先。

港股：

好似除左新鴻基(0016)之外，全部破晒3年低。

放左VTECH(0303)，因為覺得其他仲抵。

Starman係本書都講過，如果用股息再投資，假設某隻股票股息一路遞升，什至維持派息，股價跌之後得到既總值竟然高過股價升之後既總值。

除左冠君(2778)之外，其他都可以維持派息，而且領展(0823)，長建(1038)同粵海(0270)什至可以增加派息。

好！繼續捱價...

美股：

S&P500一個月跌8%，我個美股組合都跌到唔少。

依個時候我又開始月供all in股票，唔供債劵。

財務自由進度：1.36M / 10M

8/2022 股票成績

 

港股：

港股都微跌，中坑個港股組合都跌左少少。尤其係粵海投資(0270)，中期業績做得唔差架喎，但一路尋底，唔明點解 XD

依幾個月都收左股息，都買多少少建行(0939)同中電(0002)，尤其建行都8厘息了，對我依個現金流組合有好大作用。

美股：

大升之後又大跌。無乜野，繼續月供，但睇下係all in股票定係買返少少債券。

依段股市大跌，我都思考緊資產增值同現金流問題。

QQQ，VOO同BRK.B都係我用黎做資產增值既部分，但完全無現金流。

依家仲有份工返下，但之後退休，什至有咩意外返唔到工無左收入又可以點搞呢?

所以我都有留意返現金流依個topic。

最基本既收息股呀，BOND呀，REITS呀又點配置呢?

咁岩kano兄又出左依本書，睇左少少，睇落跟現金流為王1，2同懶系投資法差唔多。

先睇下ebook，睇完寫下摘要比自己睇。

財務自由進度：1.54M / 10M

7/2022 股票成績

 

港股：

粵海投資(0270)繼續係咁跌，跌到接近10年低位😅

真係唔明點解可以跌得咁勁，雖然內房股依家做得好差，但佢正職係水務嘛，現金流強勁好多。但我相信佢會升返，再睇下啦，橫掂佢個股息好穩定咁增長。

建行(0939)跌至多年低位，會考慮入貨。

今個月粵海投資(0270)，VTECH(0303)同建行(0939)都派左息，其實依家香港好多公司股息率好高，業務又無乜太大問題既不妨可以用股息再投資。

美股：

今個月終於回歸到正回報。

美股恐懼指數爆晒錶，依幾個月我都無月供過債劵，全部都買晒VOO, QQQ同BRK.B。

隨住市場認為唔會再加息，我堆債劵同股票回返唔少。

但都仲會有隠憂，會否衰退同再加息仲係未知數。

之後我會回復返股債比80:20咁月供。

財務自由進度：1.62M / 10M

6/2022 股票成績

 

港股：

隨住中電(0002)同粵海投資(0270)等既公用股大跌後，我既港股組合又去返負數😒

究竟港股收息股幾時先可以回春?😢

美股：

隨住美股一路跌，我都已經沽晒VCSH去買入我既御三守 (VOO，QQQ，BRK.B)

無晒現金，CEF同其他baby bond又唔想賣，唯有將每個月份糧都all in入美股果度。

通常一年大跌後緊接既就係大回升，相信黎明到來。

財務自由進度：1.46M / 10M (個資產一路一路咁跌都真係幾難受...)

如何繼續改善我的投資組合?

我既投資組合好簡單：80%股票 (BRK.B +  QQQ + VOO) + 20%債劵 (CEF + 幾隻ETD)，咁樣既資產配置令我覺得好安心持有。但今年既股市大跌令我思考仲有無得改善依個組合，例如可唔可以避開依個股市大跌?又或者點樣可以額外創造現金流?

經過機緣巧合下，我睇左兩本書：<<期權現金流>>同<<掌握市場周期>>

<<期權現金流>>

期權既意思我唔係度詳細講。以前我聽到期權都覺得一頭無緒，總之覺得係好危險既野。但我見到<<懶系投資法>>作者風兄同我好崇拜既blogger都有玩期權，我就試下接觸依個領域。

以前記得書店有本書叫<<期權現金流>>，就上網搵下。發現公共圖書館有依本既ebook就借黎睇下 (其實圖書館真係好多書，借完睇覺得正既話再買二手書/EBOOK都未遲)。期權想做到安全既現金流就要係有錢同有貨既情況之下做short put同short call，而且只short不put。但應該仲有好多技巧依本書都無乜點講，加上依家一張VOO short都要成100股，都係一路儲股一路慢慢研究下點玩期權，唔知仲有咩書可以睇黎學下呢?

<<掌握市場周期>>

初初學投資時睇依本書都唔知佢up乜，睇到一半就放棄左。到今年真係認真諗下有無得避開依個跌市時就諗返起依本書。依本書都係將巴菲特果句名言 "別人恐懼我貪婪，別人貪婪我恐懼" 好好好詳細咁講一次。講下人地升市時忽視風險呀，跌市時看重風險呀之類。都差唔多睇晒，但都未好清楚點樣掌握市場周期，希望有人推薦下有咩書岩睇。

周期同期權對我黎講係一D好複雜既野，亦都伴隨風險，係一個雙刃劍。希望盡量深入了解並運用。但如果無把握我都係會放棄唔用，情願懶洋洋咁time in the market，晒左D時間學野，但總好過蝕錢吧?

題外話：阿囡現正horrible 3，亦都岩岩重新開學唔習慣而心情好差，搞到我同老婆都好身心俱疲，所以真係無時間同心情去睇書，寫blog同拍youtube😓

5/2022 股票成績

 

港股：

今個月收左冠君(2778)既股息，不過佢亦係最差表現既股票👎

領展都公佈左業績，股息都係有增長，唔錯，遲D都睇返個業績報告。

6月都會有幾間公司派息，yeah~~

美股：

Nasdaq由最高位跌30%，所以我額外買多5股QQQ

BRK.B由最高位跌15%，所以我額外買多4股

已經無多餘現金繼續入股，所以係沽左VCSH買入股票。

同時再沽VCSH去繼續買入ETD。

好似加息放緩左，升返少少，加油。

財務自由進度：1.65M / 10M

4/2022 股票成績

 

港股：

用左岩岩收既股息買多少少建行(0939)，其餘無乜太大改動。

今個月恆指跌8%，我既港股組合都係跌3%，OK啦~

美股：

美股今個月真係跌到喊

SP500由最高位跌15%，所以我額外買多4股VOO

Nasdaq由最高位跌25%，所以我額外買多4股QQQ

BRK.B由最高位跌10%，所以我額外買多3股

已經無多餘現金繼續入股，如果市場再跌我就會沽債券買入股票。

已經沽晒VCIT去買入PFL同PTY，同時繼續沽VCSH去買入ETD。

財務自由進度：1.60M / 10M (跌到hihi...)

中坑youtube channel

中坑facebook

我不喜歡錢，但我喜歡自由

依排重睇返<<掌握市場週期>>。之前都睇過一次啦，不過道行未夠，好多都唔明。

點知再睇返，再度雲遊太虛，睇得唔太入腦，反而一路睇一路諗公司野。

其實我中意自己既job nature，我中意做工程，就算放工之後我都中意睇工程既野。

我都覺得自己痴痴地線，放工睇埋依D數

由始至終，我對股票真係無太大興趣，而我又無諗過自己發達，點解我仲要花咁多時間去睇書?唔比自己去打波?去陪屋企人?去打機?

我研究股票唯一既原因：我愛自由。

生活入面有太多限制，尤其返工，完全限制我既時間，加上我好唔中意早起身，返工又遠。我成日都好憧憬自己唔洗返工，買到一間大D既屋(香港唔得架啦，第日應該移民)，係屋企整一個私人工場同私人gym房，最好近籃球場比我射下波。

我既dream room😎

如果我一路返工唔投資，我諗到60歲退休先可以做自己想做既事，到時可能唔夠精神去做自己中意做既事。我想盡早過自己既生活，我想自由，而我可以自由既做法就係有足夠既現金流比我好好生活，提早退休。

所以我唔喜歡錢，但佢係令我自由既一個好好既工具！

中坑youtube channel

中坑facebook

3/2022 股票成績

 

港股：

今個月恆指真係來回地獄又折返人間，由月頭直插落18235，到月尾已經唔覺唔覺升返晒，我既港股組合都幾穩定，跌得最勁都好似唔過5%。

入左VTECH(0303)1手，因為依間公司主要做既兒童玩具好出名，負債少，而管理層每年都好慷慨咁100%利率派息，我入果陣大約13%，可以一戰。

不過入得好少，因為只剩餘好少現金，等其他股票派息時再入。但依隻股票唔係一間護城河好深既公司，所以都唔會入得多。

美股：

繼續月供。

今個月逐步將VCIT轉去PFL同PTY依2隻CEF。

兩大ETF (VOO+QQQ)收復返唔少失地，BRK.B又破頂。

2年期同10年期孳息率終於倒掛，資產配置上可能都要執執。

可以要將股債比由80:20轉做60:40。

財務自由進度：1.78M / 10M 

中坑youtube channel

中坑facebook

ETF幫你買所有最強企業！

 中坑係影片入面大約解釋下乜野叫ETF，請大家入去比個like支持下！

中坑youtube channel

中坑facebook

嘗試從債劵部分改善美股組合

中坑的美股組合裡股債比大約為80:20的策略。

股票的御三家分別係VOO, BRK.B同QQQ，除左需要平衡地區風險外，基本上都唔會有太大改動。

咁剩返20%既債劵可以點搞呢?本來都用緊債劵ETF去做債劵上的配置，但睇完風兄的<<懶系投資法2>>其中一個篇章講到關於債劵ETF之後，決定放棄用債劵ETF。

節錄自<<懶系投資法2>>

咁究竟債劵部分點樣配置先好呢?睇左幾本有提及債券既書本後，得出以下結論：

1. 買直債/ETD，但要夠分散

2. 要槓桿，更加要識去槓桿

最頭痕係第2點，揀邊隻槓?槓幾多?幾時槓?幾時去槓?都令我投晒降。

最後，發現一樣可以解決晒所有問題，仲有可以幫我做埋第1點既工具，就係固定收益既CEF (CLOSED END FUND)啦。

依度就唔解釋咩叫CEF，因為有好多高手解釋得比我更詳盡，詳情可睇下面連結：

市場先生: https://rich01.com/closed-end-funds-vs-open-end-funds/

Just a Cafe: http://www.justacafe.com/2019/01/cef.html

仲有香港代表Kano兄，佢好多post都有提及CEF，獲益良多。

總結CEF好處：

1. 一班利害一致既經理人幫你揀債同決定點做槓桿

2. 手續費比OEF透明而且低(當然啦，一定比ETF高)

但始終CEF都係經理人主動式管理，唔同CEF都有唔同既成績，所以揀CEF都要小心，什至要同時間買幾隻 (暫時得一隻心水：PTY)。

而且，CEF唔同直債有到期日，成本價得唔到保障。

咁債劵部分暫時決定咁配置，比數未定：

1. ETD/直債

2. CEFs

隨住年紀越來越大，債券比會慢慢增長，希望依個債劵配置做到大約每年7-8%增長啦。

註：

今個月無每月股票回顧，因為唔知點解google finance死左，睇唔到0823同2778，不過應該成個資產組合都跌得幾甘。 XD

主要做左：

1. 買2手領展@62.45

2. QQQ係高位跌左10%，15%同20%都有入貨，共10股

3. VOO係高位跌左10%有入貨，共3股

中坑youtube channel

中坑facebook

[窮人都可變富人] FIRE運動中改變我的4個思維 by中坑

 

有人更加需要金錢

今日唔想講投資同FIRE既野，想講下條片既小朋友。

因為疏忽導致既醫療事故，變左植物人既小朋友，佢同佢地既父母都需要幫助，佢地先係我地係社會上真正需要幫助既人。

希望大家努力賺錢同時，都可以為佢地出一分力。

• 你 手 若 有 行 善 的 力 量 ， 不 可 推 辭 ， 就 當 向 那 應 得 的 人 施 行 。
  箴 言 3:27

 

天瑜醫療事故關注組

https://www.facebook.com/%E5%A4%A9%E7%91%9C%E9%86%AB%E7%99%82%E4%BA%8B%E6%95%85%E9%97%9C%E6%B3%A8%E7%B5%84-102336835568127/about/?ref=page_internal